राजविराज । सप्तरीको ८ वटा प्रदेश निर्वाचन क्षेत्रसहित मधेश प्रदेशका सबै निर्वाचन क्षेत्रमा ५ किलोमिटर सडक कालोपत्रे हुने भएको छ ।
आइतबार प्रधानमन्त्री केपी शर्मा ओलीले भर्चुअल माध्यमबाट सबै क्षेत्रका यो योजनाको शिलान्यास गरेका छन् ।
जनकपुरधामस्थित महेन्द्रनारायण निधि भवनमा आयोजित एक कार्यक्रमकाबीच प्रधानमन्त्री ओलीले यो योजनाको शिलान्यास गरेका हुन् ।
उक्त अवसरमा बोल्दै प्रधानमन्त्री ओलीले ६४ वटै प्रदेश सभा क्षेत्रमा शुरु हुने यी योजनाको सफलताको शुभकामना दिदै यसले प्रदेशको विकासमा महत्वपूर्ण भुमिका निर्वाह गर्ने विश्वास व्यक्त गरे ।
समयमा काम नगर्ने ठेकेदारसँग ठेक्का ताेडेर नयाँलाई दिइने बताउँदै प्रधानमन्त्रीले विकासका लागि सुशासन जरुरी रहेको बताए । ‘सुशासन अरू कसैले ल्याइदिदैन’ उनले भने, ‘हामी सबै आफैंले कायम गर्नुपर्छ ।’
केही समय मधेश प्रदेशको विकास हुन नसकेको बताउँदै उनले अब द्रुत गतिमा विकास हुने विश्वास दिलाए ।
सप्तरीमा कहाँ-कहाँ हुदैछ कलोपत्रे ?
सप्तरीको प्रदेश सभा क्षेत्र नम्बर १ को क मा अग्निसाइर कृष्णसवरन गाउँपालिका भवनदेखि इटहर्वा-कमलपुर-दिघवा- राजविराज सडक खण्ड, १ को ख अन्तर्गत अर्जी-त्रिकाैल-पिप्राही, क्षेत्र नम्वर २ को क अन्तर्गत सखडा-मौवाहा-मोहनपुर-रम्पुरा र २ को ख अन्तर्गत सिङ्यौनदेखी खाँडाे नदीसम्मकाे सडक खण्डमा ५ किलोमिटर कालोपत्रे सडक निर्माण हुनेछ ।
क्षेत्र नम्बर ३ काे क अन्तर्गत रुपनी रोडस्थित पौवा-बसबट्टी-मुसहर्निया-काेलहट्टा-मलेठसम्म, ३ काे ख अन्तर्गत देउरी-तरही-भुतही-पातो-बथनाहा-चपेना-सिंग्याैन-कट्टीसम्म कालोपत्रे हुनेछ ।
यस्तै, क्षेत्र नम्बर ४ को क अन्तर्गत कुसहा-पटेर्वा-बेल्ही बोर्डरसम्म तथा क्षेत्र नम्बर ४ को ख अन्तर्गत गौडा-सारस्वर-मधुवन-बलानपट्टी-बलानबिहुल गाउँपालिकाको कार्यालय-गौडा बलानपट्टीसम्म कालोपत्रे हुनेछ ।
