दिपेन्द्र पासवान
सुरुङ्गा । सप्तरीको सुरुङ्गा नगरपालिका ७ हरिपुरमा एक युवतीको मृत्युको प्रकरण सेलाउन नपाउँदै अर्की एक युवतीको हत्या प्रयास भएको छ ।
हरिपुरकी १९ बर्षीया पूजा कुमारी राम गत २ बैशाखमा घर नजिकैको पोखरीमा मृत भेटिएकी थिइन् । उनको हत्या भएको बताइएपनि घट्नाबारे अहिलेसम्म खुल्न सकेको छैन् ।
यहीं ठाउँ निवासी संजय मण्डलकी २० बर्षीया छोरी अर्चना मण्डलको हत्याको प्रयास भएको छ । सोमबार बिहान करिब ६ बजे घरबाट विद्यालय जाँदै गरेको अवस्थामा कुशहा– हरिपुर सडक खण्ड अन्तर्गत सुली गेट नजिकै यो घटना भएको हो ।
युवतीका हजरबुवा दुलिचन मण्डलका अनुसार अर्चनालाई दुई जना नकाबधारीले पछाडिबाट एक्कासी समातेर बाटो छेउमै लडाएको र ब्लेडले घाँटीमा काट्न लाग्दा उनले जसोतसो आफ्नो ज्यान बचाएकी हुन् । लछारपछारका क्रममा उनी घाईते भएकी छन् ।
अर्चनाका अनुसार बाटोमा पछाडिबाट मान्छे आईरहेको देखेर ती व्यक्तिहरु आफूलाई सामान्य घाईते बनाई घटनास्थलदेखि दक्षिण पश्चिम तिरको झारडीतिर भागेका थिए ।
घटना लगतै गाउँकै बिद्यालय तिर जाँदै गरेका एक शिक्षकले युवती बाटो छेउमा बेहोस अबस्थामा लडिरहेको देखेपछि उनलाई हतार हतार नजिकको अस्पताल पु¥याईएको प्रत्यक्षदर्शीहरुले बताएका छन् ।
एक प्रत्यक्षदर्शीले आफू घटनास्थल पुग्ने बितिकै पीडित युवतीलाई बोल्न कठिनाई भईरहेको र हातले दक्षिण पश्चिम तिर ईशारा मात्र गरिरहेको बताए ।
आफ्नो ड्युटीमा जाँदै गरेका आधारभुत विद्यालय हरिपुरका प्रअ अरुणदेब साहले बालिकाको अबस्था देखेर आफ्नै मोटरसाईकलबाट कुशहा स्थित जिनिस अस्पताल प¥याई दिएको उनले बताए ।
घटना भएलगतै अस्पताल पुगेको ईलाका प्रहरी कार्यालय कडरबोनाका प्रहरी निरीक्षक गजेन्द्र रायले बालिकाको अवस्था समान्य रहेको बताए ।
उनले घटनाको बारेमा अनुसन्धान भइरहेको बताए । ‘यस बिषयमा प्रत्यक्षदर्शी तथा पीडित परिवारका सदस्यहरुसँग सोधपुछ गर्दै घट्नाको बिषयमा अनुसन्धान शुरु गरेका छौं’ उनले भने ।
