राजविराज । सप्तकोशी नदीमा डुबेर बेपत्ता भएका दुईजना सशस्त्र प्रहरीलाई खोज्ने क्रममा अर्को एक ब्यक्तिको शव भेटिएको छ ।
बर्षातको समयमा बाढीपहिरोबाट फँसेका सर्वसाधारणलाई उद्धार गर्नका लागि मधेश प्रदेश सशस्त्र प्रहरी कार्यालयबाट सप्तकोशीमा गोताखोर सहितको उद्धार टोलीले अभ्यास गरिरहेको बेला डुबेर बेपत्ता भएका सशस्त्र प्रहरीका जवानलाई खोज्ने क्रममा अर्को एक ब्यक्तिको शव भेटिएको घट्नास्थलमा पुगेका सप्तरीका प्रमुख जिल्ला अधिकारी भोला दाहालले जानकारी दिए ।
उक्त शव कसको हो ? भन्ने खुल्न सकेको छैन ।
अभ्यास गर्ने क्रममा डुबेर बेपत्ता भएका सशस्त्र प्रहरी जवान सुरज साउद र हरदेव राजवंशीकाे खाेजी भइरहेकाे प्रमुख जिल्ला अधिकारी दाहालले बताए ।
उनका अनुसार नदीमा बेपत्ता भएकाहरूलाई उद्धार गर्न सप्तरी र सुनसरीका प्रहरी युनिटबाट थप जनशक्ति परिचालन गरी उद्धारको काम जारी छ ।
