राजविराज । जेनजी आन्दोलनको क्रममा जलाइएका नेपाली कांग्रेस, सप्तरीको कार्यालय संचालनमा आएको छ ।
कार्यालयभित्र २४ भदौमा आगजनी गरिएको थियो । आगजनीले कार्यालयभित्रको फर्निचरसहित सम्पूर्ण सामान जलेर नष्ट भएको छ । जलेका सामानहरु हटाएर कार्यालय संचालनमा ल्याइएको पार्टीका जिल्ला सचिव सनत कुमार मण्डलले जानकारी दिए ।
पार्टी सचिव मण्डलसहित जिल्ला सदस्यहरु शम्भुलाल देव, नेवि संघका जिल्ला अध्यक्ष राकेश ठाकुरसहितकाहरु कार्यालय सफा गरेर संचालनमा ल्याएका हुन् ।
पार्टी सचिव मण्डलका अनुसार स्टीलको टेबल ६ थान, मुभिङ कुर्सी ६ थान, सोफा १ सेट, स्टील कुर्सी ३ थान, स्टीलको दराज २ थान, प्लाष्टिकको कुर्सी २०० थान, एलइडी टिभी एक थान, साउण्ड सिस्टम एक थान जलाएर नष्ट गरिएको छ ।
यस्तै, पानी तान्ने मोटर, पानीको जार , ३ थान सिलिङ पंखा, २ थान स्टेन्ड पंखा, कार्यालयको ढोका समेत जलेर खरानी भएको सचिव मण्डलले बताए ।
‘काठमाडौंमा निहत्था युवालाई गोली हान्दा हामीले बिरोध गरेकै थियौं’ सचिव मण्डलले भने, ‘ जेनजीको आन्दोलनमा समेत समर्थन गरेकै थियौं । तर, आन्दोलनमा घुसपैठियाहरुले सार्वजनिक सम्पत्ति नष्ट गरेको देख्दा चित्त दुखेको छ ।’
उनले जेनजीको आन्दोलनको आडमा उपद्रब मच्चाउनेहरुको पहिचान समेत भइसकेकाले राज्यले अबिलम्ब कार्वाही गर्नुपर्ने बताए ।
