राजविराज । आफ्नो २५ औं स्थापना दिवसको अवसर पारेर सशस्त्र प्रहरीले “पूर्व–पश्चिम झण्डा मार्च कार्यक्रम“ आयोजना गरेको छ ।
पुर्वको मेची पुलबाट र पश्चिमको महाकालीबाट एकसाथ यो मार्च शुरु गरिएको छ ।
पुर्वको मेचीबाट निस्केको मार्च टोली शुक्रबार सप्तरी आइपुगेको छ । पुर्वको झापा, मोरङ र सुनसरी हुँदै सप्तरी आएको टोलीले नेपालको राष्ट्रिय तथा सशस्त्र प्रहरीको झण्डा सप्तरी तथा मधेश प्रदेशको टोलीलाई हस्तान्तरण गरेको छ ।
दुबै झण्डा सुनसरी जिल्लाका प्रमुख जिल्ला अधिकारी बासुदेव घिमिरेले सप्तरीका प्रमुख जिल्ला अधिकारीलाई र सशस्त्र प्रहरी कोशी प्रदेशका प्रमुख डीआईजी कुमार न्यौपानेले मधेशका डीआईजी कृष्ण ढकाललाई हस्तान्तरण गरे ।
बाजागाजासहित भारत–नेपालको सिमा छेउ हुँदै सुरु गरिएको झण्डा मार्च अब सप्तरीको टोलीले सिरहाको टोलीलाई हस्तान्तरण गर्नेछ ।
झण्डा बोकेर पैदलै हिडेर टोलीले आइतबार बिहान सिरहाको टोलीलाई हस्तान्तरण गर्ने सशस्त्र प्रहरी बल ६ नम्बर गण हेड क्वाटर सप्तरीका प्रमुख सशस्त्र प्रहरी उपरीक्षक रोशन बुढाथोकीले जानकारी दिए ।
उनका अनुसार प्रहरी निरीक्षकको कमाण्डमा ३५ जना यो कार्यमा खटिएका छन् ।
सशस्त्र प्रहरीका अनुसार पुर्वमा मेची र पश्चिमा महाकालीबाट एकै पटक २० पुसबाट प्रारम्भ भएको “झण्डा मार्च“ पर्सास्थित ठोरीमा आगामी माघ ७ गते मिलन हुनेछ । दुबै टोलीको मिलनपछि ठोरीमा कार्यक्रमको आयोजना हुनेछ । उक्त कार्यक्रममा सशस्त्र प्रहरी महानिरीक्षक समेत आएर सम्बोधन गर्नेछन् ।
यो मार्च पास नेपाल–भारत सिमाबर्ती क्षेत्र हुँदै अघि बढ्ने सशस्त्र प्रहरीले जनाएको छ ।
माघ ९ गते सशस्त्र प्रहरीले स्थापना दिवस मनाउँदै आएको छ ।
