राजविराज । उत्कृष्ट विद्यार्थी उत्पादन गर्दै राज्यलाई राजस्व समेत बुझाउँदै आएपनि आफूहरुमाथि पटक–पटक प्रहार गर्ने गरिएको नीजि विद्यालयका संचालकहरुले गुनासो गरेका छन् ।
नीजि तथा आवासीय विद्यालय अर्गनाइजेशन (प्याब्सन) सप्तरीको बुधबार राजविराजमा आयोजना गरिएको दोस्रो जिल्ला परिषद् भेलाका बक्ताहरुले यस्तो गुनासो गरेका हुन् ।
कार्यक्रमका प्रमुख अतिथी प्याब्सनका केन्द्रीय उपाध्यक्ष अनिल झाले मुलुकलाई नीजि विद्यालयले दिएको योगदानको प्रशंसा नगरी राज्यले नै प्रहार गर्ने गरेको बताए ।
‘नीजि विद्यालयले राम्रो विद्यार्थी उत्पादन गर्दै राज्यलाई अरबौं राजस्व समेत तिर्दै आएको छ’ उनले भने, ‘तथापी पनि राज्यले कहिले कम्पनीमा त कहिले गुठीमा लग्ने नाममा दुःख दिदैं आएको छ ।’
उपाध्यक्ष झाले शिक्षा ऐन आएर आफूहरुको समस्या समाधान हुने आशा भएपनि जेनजी आन्दोलनका कारण त्यो पनि सफल हुन नसकेको उल्लेख गरे ।
कार्यक्रममा प्याब्सनका केन्द्रीय सदस्य नागेन्द्र कुमार श्रेष्ठले राज्य अहिले पनि नीजि विद्यालयप्रति सकारात्मक हुन नसकेको बताए ।
प्यब्सनका मधेश प्रदेश उपाध्यक्ष अरुण कुमार देवले सम्पूर्ण प्याब्सनकर्मीलाई एकजुट भएर अघि बढ्नुपर्नेमा जोड् दिए ।
प्याब्सनका जिल्ला अध्यक्ष उग्रकान्त झाको अध्यक्षतामा आयोजना गरिएको कार्यक्रममा नेपाल पत्रकार महासंघ, सप्तरीका अध्यक्ष श्रवण कुमार देवले समेत मन्तव्य व्यक्त गरेका थिए ।
