राजविराज । नेपाली कांग्रेस, सप्तरीका सचिव सनत मण्डलले परिवर्तित समयमा पार्टीमा पनि परिवर्तन आएको बताएका छन् ।
जेनजी आन्दोलनपछि देश अर्कै दिशामा अघि बढेको बताउँदै सचिव मण्डलले त्यसका लागि सबैलाई परिवर्तन हुनु आवश्यक रहेको बताए । ‘त्यहीं अनुसार पार्टीमा पनि परिवर्तन आउनु सकारात्मक हो’ मण्डलले भने, ‘अब पार्टी थप सुदृढ र मजबुत हुँदै अघि बढ्नेमा विश्वस्त छु ।’
पार्टीभित्र विशेष महाधिवेसनको प्रकृया शुरु भएकै बेलादेखि सकृय भएका मण्डल पार्टीमा युवा नेतृत्व आउनु सकारात्मक भएको बताएका छन् । ‘बर्तमान अवस्थामा युवा नेतृत्वको आवश्यक्ता थियो’ उनले भने, ‘अब पार्टी पनि सकारात्मक दिशातर्फ अघि बढ्छ ।’
पार्टीमा गगन थापालाई सभापति बनाउन प्रयासरत मण्डलले आफूसहित मधेशका नेताहरुको प्रयास सार्थक भएको बताए । ‘अब सभापतिज्यूले सबैलाई मिलाएर अघि बढ्नेमा विश्वस्त छु’ इ ग्रीन मधेशसँग कुरा गर्दै उनले भने, ‘देशले नै परिवर्तन चाहेको अवस्थामा कांग्रेसभित्र आएको परिवर्तनलाई सबैले खुशी–खुशी स्वीकार्दै अघि बढ्नु जरुरी छ ।’
