![]()
राजविराज । नेपाल डेमोक्रेटिक लयर्स एशोशिएशन (डिएलए) नेपालको ३७ औं स्थापना दिवसको अवसरमा सप्तरीका दुई वरिष्ठ अधिवक्तासहित तीन जना सम्मानित भएका छन् ।
डिएलए सप्तरीले राजविराजमा शनिबार आयोजना गरेको कार्यक्रममा ५ दशकभन्दा बढी कानुनी व्यावसायी भएर न्याय क्षेत्रमा महत्वपूर्ण योगदान दिने वरिष्ठ अधिवक्ताद्वय हिम्मत सिंह र अमरबहादुर पाण्डे तथा दुई दशकदेखि यश क्षेत्रमा सक्रिय रहेका राजविराज उच्च अदालत बार एशोसिएसनका अध्यक्ष हरेराम यादवलाई सम्मानित गरिएको छ ।
वरिष्ठ अधिवक्ताद्वय सिंह र पाण्डेलाई डिएलए सप्तरीका अध्यक्ष सुरेन्द्र यादव र राजविराज उच्च अदालत बार एशोसिएसनका अध्यक्ष हरेराम यादवले संयुक्त रूपमा दोसल्ला र माला लगाएर सम्मान गरे ।
अध्यक्ष यादवलाई कार्यक्रमका प्रमुख अतिथि वरिष्ठ अधिवक्ता हिम्मत सिंहले सम्मान गरे ।
सम्मान ग्रहण गर्दै वरिष्ठ अधिवक्ता हिम्मत सिंहले सर्वसाधारण जनताको निष्पक्ष न्याय र लोकतान्त्र स्थापनाका लागि डिएलएले स्थापना कालदेखि अहिलेसम्म महत्वपूर्ण भूमिका खेल्दै आएको बताए ।
उनले जनताको सहज र निश्पक्ष न्यायका लागि आगामी दिनमा पनि डिएलएले महत्वपूर्ण भूमिका खेल्ने विश्वास व्यक्त गरे ।
डिएलए सप्तरीका अध्यक्ष सुरेन्द्र यादवको अध्यक्षतामा आयोजित कार्यक्रममा वरिष्ठ अधिवक्ता अमर बहादुर पाण्डे, कृष्णानन्द देव, बोध कृष्ण भगत, नारायण झा, रामजी साह डा.देवनारायण यादव, इन्द्र देव सिंह, राजविराज उच्च अदालत बार एशोसिएशन अध्यक्ष हरेराम यादव, उपाध्यक्ष धर्मेन्द्र यादव, पूर्व अध्यक्ष भरत यादव, अधिवक्ताहरू प्रल्हाद घिमिरे, शिवनारायण यादव, राजेन्द्रप्रसाद देव, सुभाष यादव, विनोद पाण्डे, सुधा देव लगायतले शुभकामना मन्तव्य दिएका थिए ।
यसअघि विहान डिएलए सप्तरीले स्थापना दिवसको अवसरमा प्रभातफेरी र्याली निकालेर राजविराजको विभिन्न भागको परिक्रमा गरेको थियोे ।







