राजविराज । राजविराज बसपार्क आगामी बैशाख १ गतेदेखि संचालनमा आउने भएको छ । सरोकारबालाबीच बुधबार भएको सहमति अनुसार नयाँ बर्षको अवसर पारेर बैशाख १ गतेदेखि संचालनमा ल्याइने भएको हो ।
बुधबार जिल्ला प्रशासन कार्यालयमा बसेको सरोकारबालाको बैठकले बैशाख १ गतेदेखि आंशिक रुपमा बसपार्क संचालनमा ल्याउने सहमति भएको हो । बसपार्क राजविराज नगरपालिका वडा नम्बर २ राजदेवी चोकमा निर्माण भएको छ ।
बसपार्क चैत १ गतेदेखि नै संचालनमा ल्याउने तयारी गरिएपनि केहि काम बाँकी रहेकाले बैशाख १ गतेदेखि संचालनमा ल्याउने भएको हो ।
बैठकमा बसपार्क निर्माण गरेको ठेकेदार कम्पनी सिनर्जी विल्डर्स प्रालि कुलेश्वर काठमाडौंका प्रतिनिधीले चैत १५ गतेभित्र पानी, विजुली, शौचालय र टिकट काउण्टरमा सिसा ढोका लगायतका पूर्वाधारका काम चैत १५ गतेभित्र सकिने प्रतिबद्धता जनाएका छन्
यी काम गरेर बैशाख १ गतेबाट आंशिक संचालनमा ल्याउने सहमति भएको छ’ प्रमुख जिल्ला अधिकारी भूपेन्द्र थापाले भने, ‘बसपार्कको सम्पूर्ण काम २०८० साल असार मसान्तभित्र सम्पन्न गर्ने प्रतिबद्धता निर्माण कम्पनीले गरेको छ ।’
बैठकमा सहभागी भएका प्रतिनिधीसभा सदस्य दिनेश यादव, राजविराज नगरपालिकाका कार्यबाहक प्रमुख इसरत परबिनसहितकाले समयमा काम सम्पन्न नहुँदा रोष प्रकट गरेका थिए ।
