जनकपुरधाम । जनकपुर बिमानस्थलमा मुसापछि स्याल भेटिएको छ । स्यालकै कारण आईतबार साँझ एउटा जहाज अवतरण नै गर्न नसकी काठमाडौं फर्किएको छ ।
काठमाडौंबाट उडेको यति एयरलाइन्सको जहाज जनकपुर आइपुग्दा समेत स्यालकै कारण अवतरण गर्न नसकी पुनः काठमाडौं लगिएको छ ।
काठमाडौंबाट जनकपुरको लागि साँझ ६ः१० को जहाज ६ः२० मा उडेको थियो । जनकपुर विमानस्थल आइपुगेको जहाज अवतरण गर्ने क्रममा पाइलटले रनवेमा स्यालदेखेपछि पुनः काठमाडौं फर्काएका हुन् ।
यति एयरलाइन्सका प्रबन्धक राजेश सिंहले पाइलटले दुईपटक अवतरणको प्रयास गरेको बताए । तर एकपटक स्याल र अर्कोपटक पानी परेको कारण प्रतिकुल मौसमका कारण अवतरण गर्न नसकेर जहाज पुनः काठमाडौं नै फर्किएको उनले बताए ।
पाइलटले एटीसीलाई रनवेको अवस्थाको बारेमा जानकारी गराउँदा जहाज अवतरण नगर्न भनेपछि जहाज ओभरसुट गरी फर्केको उनको भनाई छ ।
उक्त जहाजमा ५९ जना यात्रु सबार थिए ।
