राजविराज । ६९औ प्रहरी दिवस सप्तरीमा पनि भव्यतापूवर्क मनाइएको छ ।
मधेश प्रदेश प्रहरी तालिम केन्द्र राजविराज र जिल्ला प्रहरी कार्यालय, सप्तरीको संयुक्त आयोजनामा बुधबार राजविराजमा एक कार्यक्रम गरी प्रहरी दिवस मनाइएको हो ।
कार्यक्रमलाई सम्बोधन गर्दै प्रमुख अतिथि सप्तरीका प्रमुख जिल्ला अधिकारी मेखबहादुर मंक्रान्तीले प्रहरीले उच्च आचरण राख्दै इमान्दारिताका साथ काम गर्नुपर्ने बताए । ‘प्रहरीले यसरी काम नगरे नागरिकस्तरबाट आवाज उठछ’ उनले भने, ‘आवाज उठेपछि सुशासन कमजोर हुँदै जान्छ ।’
शान्ति सुरक्षा र अमन चयन कायम गर्न प्रहरीको सफलता र सक्षमता जरुरी रहेको उनले बताए । प्रहरीको सफलता र सक्षमता बिना शान्ति सुरक्षा असम्भव हुने उनको भनाई छ ।
प्रहरी पनि कष्टकर अवस्थामा ड्युटीमा खटिरहेको बताउँदै उनले प्रहरीको मनोवल उच्च बनाउनु पनि आवश्यक भएको धारणा राखे ।
जिल्ला न्यायाधिवक्ता गोकुल निरौला, नेपाल पत्रकार महासंघ, सप्तरीका अध्यक्ष श्रवण कुमार देव, पूर्व प्रहरी संगठन मधेश प्रदेशका सह सचिव प्रसनी राजेन्द्र बिकसहितकाले प्रहरीले इमान्दारीपूर्वक काम गर्नुपर्ने बताए ।
कार्यक्रममा तालिम केन्द्रका प्रमुख एसएसपी गोपालचन्द्र भट्टराईले धन्यवाद ज्ञापन गरे भने सप्तरीका प्रहरी प्रमुख एसपी ढकेन्द्र खतिवडाले स्वागत मन्तव्य गर्दै प्रहरी महानिरीक्षक वसन्त कुवरको शुभकामना सन्देश वाचन गरेका थिए ।
उक्त अवसरमा अमर प्रहरीका परिवारलाई दोसल्ला ओढाएर सम्मान गरियो ।
अमर प्रहरी शिवनारायण मण्डल, विन्देश्वर मण्डल, ब्रहमदेव यादव, मीन बहादुर कार्की, रामसुफल मण्डल, कृष्ण श्रेष्ठ, नवराज ठाकुर, राजकुमार सिंहसहितका परिवारलाई प्रमुख जिल्ला अधिकारी मंग्रातीले दोसल्ला ओढाएर सम्मान गरे ।
प्रहरीलाई विभिन्न समयमा सहयोग गरेको भन्दै राजविराज र डाक्नेश्वरी नगरपालिका तथा बलान बिहुल, बिष्णुपुर र छिन्नमस्ता गाउँपालिकालाई प्रशंसा पत्र प्रदान गरियो ।
यस्तै, इलाका प्रहरी कार्यालय पातोको भवनका लागि जग्गा प्रदान गर्ने डाक्नेश्करी ६ बस्ने लक्ष्मीकान्त चौधरी, प्रहरीलाई बिभिन्न क्षेत्रबाट सहयोग गर्ने हनुमाननगर कंकालिनी नपा १० का कमल मण्डल, शम्भुनाथ १० बस्ने शम्भुनाथ साह, झिझिया नाचमा सहयोग गर्ने रमानन्द देव, सुरुङा १ का बिनोद कुमार चौधरी, बोदे बर्साइन २ बस्ने अनवर अली, पतन्जली योग समितिका प्रशिक्षक बद्रीराज भन्डारी, पतञ्जली योग समितिका अध्यक्ष पंकज देवसहितकालाई समेत प्रशंसा पत्रबाट सम्मान गरियो ।
उत्कृष्ट कार्य गर्ने प्रहरी निरीक्षक राकेश राइसहितका प्रहरी कर्मचारीलाई नगद पुरस्कारसहित तथा प्रहरी दिवसको अवसरमा आयोजित फुटबल, क्रिकेट, टेबल टेनिस खेलका विजयी खेलाडीलाई पनि तालिम केन्द्रका प्रमुख एसएसपी भट्टराईले पुरस्कृत गरेका थिए ।
