राजविराज । दलित सरोकार मञ्च, नेपालले दलित समुदायमाथि भइरहेका बलात्कार, हत्या तथा दमनका घटनामा निष्पक्ष अनुसन्धान गर्न माग गरेको छ ।
नेपालमा दलित समुदायमाथि भइरहेको हिंसा, बलात्कार, र अन्तरजातीय विवाह गर्ने जोडीमाथि राज्यसंयन्त्रकै संलग्नतामा भइरहेको दमनप्रति गम्भीर ध्यानाकर्षण भएको भन्दै मञ्चले बिज्ञप्ती जारी गर्दै निष्पक्ष अनुसन्धान गर्न माग गरेको हो ।
मञ्चले सिरहा, सर्लाही, रौतहटसहितका जिल्लामा दलित समुदायमाथि भइरहेको अन्यायका घटनालाई उजागर गर्दै दोषीलाई तत्काल कार्वाही गर्न माग गरेका हुन् ।
सिरहाको नवराजपुर गाउँपालिका १ मा १७ वर्षीया रिंकुकुमारी सदामाथि भएको सामूहिक बलात्कार र त्यसपछि उनको मृत्यु अत्यन्त शंकास्पद भएको भन्दै बिज्ञप्तीमा निष्पक्ष अनुसन्धानको माग गरेको छ ।
‘माघ २७ गते रुपेश मण्डल, चन्दन साह र रामविनय मण्डलले किशोरीलाई सामूहिक बलात्कार गरेको आरोप छ । समाजकै केही अगुवाहरूले १ लाख ४० हजार रुपैयाँ लिएर मिलापत्र गराएको खुलासा भएको छ’ बिज्ञप्तीमा भनिएको छ, ‘माघ ३० गते उनी मृत अवस्थामा फेला परेकी थिइन् । यस घटनामा संलग्न ८ जनाविरुद्ध जाहेरी दर्ता भए पनि कोही पक्राउ नपरेकाले दोषीलाई तत्काल पक्राउ गरी कार्वाही गर्न माग गर्दछौं ।’
बिज्ञप्तीमा सर्लाहीमा सत्येन्द्रकुमार राम र नेहा रौनियारको अन्तरजातीय विवाहमा भएको हस्तक्षेपप्रति आपत्ति जनाइएको छ । ‘कानुनी रूपमा विवाह गरेका उनीहरूलाई राजनीतिक पहुँचको दुरुपयोग गर्दै भारतसम्म गएर पक्राउ गर्नु गम्भीर विषय हो’ बिज्ञप्तीमा भनिएको छ, ‘सत्येन्द्रलाई बालविवाहको झुटा आरोप लगाएर फसाउन खोजिनु कानुनी दुरुपयोगको उदाहरण हो ।’
सर्वोच्च अदालतले नेहालाई सत्येन्द्रकै जिम्मा लगाउने आदेश दिए पनि निरन्तर धम्की दिइनु मानवअधिकारको उल्लंघन भएको बिज्ञप्तीमा भनिएको छ ।
रौतहटस्थित वृन्दावन नगरपालिकाका कार्यपालिका सदस्य राजेश पासवान र मुस्लिम नेता सलाउदिन दर्जीलाई राज्य संयन्त्रद्वारा झुटा मुद्दामा फसाउने प्रयास भएको समेत बिज्ञप्तीमा आरोप लगाइएको छ ।
जातीय भेदभावविरुद्ध आवाज उठाउनेहरूमाथि प्रतिशोधस्वरूप फसाउने प्रयास भइरहेको दाबी गर्दै बिज्ञप्तीमा भनिएको छ, ‘प्रहरी प्रशासन समेतको मिलेमतो देखिएकाले निष्पक्ष अनुसन्धान गरी दोषीलाई कार्वाही गरिनुपर्दछ ।’
मागहरू सम्बोधन नगरिए न्यायका हिमायतीहरूसँग मिलेर आन्दोलन गर्ने चेतावनी पनि बिज्ञप्तीमा दिइएको छ ।
