राजविराज । आगोमा जलाएर हत्या गरिएका पत्रकार सुरेश रजकको स्मरणमा सप्तरीका पत्रकारहरुले मैनबत्ति प्रज्जवलन गरेका छन् ।
राजविराजस्थित गजेन्द्र चोकमा भेला भएका यहाँका पत्रकारले स्व. पत्रकार रजकको स्मरणमा मैनबत्ति बाले । एक मिनेट मौन धारण गर्दै पत्रकारहरुले स्व. पत्रकारप्रति श्रद्धाञ्जली व्यक्त गरे ।
नेपाल पत्रकार महासंघ, सप्तरीको अगुवाईमा मैनबत्ति प्रज्जवलन गर्दै एक मिनेट मौन धारण गरिएको हो ।
गत चैत १५ गते काठमाडौंको तिनकुनेस्थित एक घरमा रिपोर्टिङ गर्न गएको बखत बाहिरबाट ताला लगाई आगो लगाइदिएर उनको हत्या गरिएको हो ।
नेपाल पत्रकार महासंघले यो जधन्य अपराध गर्नेलाई कार्वाहीको दायरामा ल्याउन माग गरेपनि सरकारले ध्यान नदिँदा अर्काे चरणको आन्दोलनको कार्यक्रम सार्वजनिक गरेको छ ।
कार्यक्रम अन्तर्गत नेपाल पत्रकार महासंघका पूर्व अध्यक्षहरुसँग अन्तरकृया, सम्पादकहरुसँग अन्तरकृयाजस्ता गतिविधी गरिनेछ ।
