राजविराज । एक साताअघि राजविराज नगरपालिकामा ताेडफाेड गर्नेलाई कार्वाहीको माग गर्दै प्रहरीमा निवेदन पुगेको छ ।
नगरपालिकाका कार्यवाहक मेयर इसरत परबिनले तोडफोड गर्नेलाई कार्वाहीको माग गर्दै मंगलबार जिल्ला प्रहरी कार्यालयमा निवेदन दिएकी हुन् ।
केही वडा अध्यक्ष र आन्दोलनरत कर्मचारीका साथ जिल्ला प्रहरी कार्यालय पुगेकी उनले प्रहरी प्रमुख एसपी ढकेन्द्र खतिवडालाई निवेदन हस्तान्तरण गरेकी हुन ।
निवेदनमा निलम्बित मेयर भीमराज यादवसहितकालाई विपक्षी बनाइएको छ ।
यादवसहित नगरपालिकाका योजना शाखा प्रमुख मनोज यादव, राजविराज-९ का सुधीर यादव, राजविराज-७ बस्ने गज्जु भनिने गजेन्द्र यादवसहित २०/२५ जनाले सार्वजनिक, भौतिक संरचनाको अनाधिकृत रूपमा विनाश एवं अपराधिक उपद्रवतर्फ अपराध गरेको निवेदनमा जिकिर गरिएको छ ।
नगरपालिकाकै लेटर प्याडमा लेखिएको निवेदनमा ती व्यक्तिहरुले लेखा अधिकृत शत्रुधन लाल दासलाई कुटपिट गरि निजले लगाएको २ तोलाको सुनको सिक्री समेत खोसेको उल्लेख गरिएको छ ।
निवेदनमा मुलुकी फौजदारी कार्यविधि संहिता २०७४ काे दफा ६ नम्बर बमोजिम अबिलम्ब नियन्त्रणमा लिई कार्वाही गर्न माग गरिएको छ ।
निवेदन बुझ्दै प्रहरी प्रमुख खतिवडाले अध्ययन गरेर प्रक्रिया अगाडि बढाइने बताएको कावा मेयर परबिनले बताइन ।
परबिनले प्रमुख जिल्ला अधिकारी भोला दाहाल समेतलाई निवेदन दिएको बताइन ।
गत २७ जेठमा प्रमुख प्रशासकीय अधिकृतको विवादका कारण झडप र तोडफोड भएको थियो । घरमै बढी बस्ने गरेको र काम नगरेको भन्दै तत्कालीन प्रमुख प्रशासकीय अधिकृत डा. श्रवण साहको सरुवा गराई कावा मेयर इसरत परबिनले शिक्षा शाखा प्रमुख भोगेन्द्र यादवलाई निमित्त प्रमुख प्रशासकीय अधिकृत बनाएर ल्याएकी थिइन ।
यो जानकारी पाएपछि निलम्बित मेयर भीमराज यादवले नगरपालिकाको कार्यालयमा २५ जेठमा ताला लगाएका थिए ।
यादवले लगाएको ताला तोड्दै परबिन नेतृत्वको जनप्रतिनिधिले निमित्त हाकिम भोगेन्द्र यादवलाई २७ जेठमा हाजिर गराएपछि यादव समर्थकले नगरपालिकामा व्यापक तोडफोड गरेका थिए ।
हेर्नुहोस प्रहरीमा दिइएको निवेदन
