राजविराज । देशकै प्रसिद्ध शक्तिपीठ सप्तरीको छिन्नमस्तास्थित सखडेश्वरी भगवती मन्दिरमा सिसिटिभी मार्फत् प्रहरीले निगरानी राख्ने भएको छ ।
मन्दिरको तयारी र सुरक्षाको बिषयलाई लिएर सोमबार बसेको सरोकारबालाहरुको बैठकले यस्तो निर्णय गरेको छ । मन्दिर परिसरमा ३२ वटा सिसिटिभी क्यामेरा लगाइएको र ती सबै क्यामेराको निगरानी नेपाल प्रहरीले गर्नेछ ।
सप्तरी प्रहरीका प्रमुख एसपी गौतम कुमार केसीले प्रहरीले सुरक्षा दिदैं सिसिटिभी मार्फत् निगरानी गर्ने बताए । दशैंको बेला हुने अत्यधिक भिंडभाडका क्रममा अपराधिक घट्ना हुन नदिन प्रहरी चनाखो रहने बताए ।
बैठकमा प्रमुख जिल्ला अधिकारी टुवराज पोखरेलले सुरक्षामा कुनै कमी हुन नदिने बताए ।
छिन्नमस्ता गाउँपालिकाका अध्यक्ष विद्यानन्द चौधरीले दशैंको तयारी भव्य तरिकाले भइरहेको बताए । उनले दशैंमा नेपालसहित भारतीय दर्शनार्थी समेत अत्यधिक आउने भएकाले सुरक्षा निकायले गम्भीर भएर काम गर्नुपर्ने बताए ।
पूर्व मन्त्री उमेश कुमार यादवले तयारीमा कुनै कमी हुन नदिन मन्दिर समितिसँग आग्रह गर्दै सरसफाईलाई पनि प्राथमिकतामा राख्नुपर्ने बताए ।
मन्दिरका पीठाधीश महाकान्त ठाकुरले सम्पूर्ण आवश्यक तयारी तिब्र गतिमा भइरहेको बताए । मन्दिर समितिका कार्यबाहक अध्यक्ष समेत रहेका उनले मन्दिरको चारैतिर शौचालय, खानेपानी जडान भइसकेको भन्दै दर्शनार्थीलाई कुनै समस्या हुन नदिनका लागि आफूहरु तत्पर रहेको बताए ।
बैठकले भीड व्यवस्थापनका ठूलो संख्यामा प्रहरी परिचालन, मन्दिर क्षेत्रलाई सिसिटिभीको निगरानी, आवतजावतमा सहजिकरण गर्ने, सुरक्षा प्रबन्ध मिलाउने निर्णय गरेको छ ।
हिन्दुहरूको महान चाड दशै शुरु भएसँगै यो मन्दिरमा व्याप्क तयारी थालिएको छ । दशैंमा लाखौंको संख्यामा भक्तजन मन्दिर आउने भएकोले आवतजावतको सुविधादेखि सुरक्षा व्यवस्थालाई विशेष ध्यान दिँदै तयारी थालिएको ठाकुरले बताए ।
यो मन्दिरमा विशेषगरी सप्तमी, अष्टमी र नवमीका दिन भक्तजनहरूको अत्याधिक भीड लाग्ने गर्दछ ।
यी तीन दिनमा नेपाल तथा भारतका करिब १० लाख भक्तजन पूजाआजाका लागि छिन्नमस्ता आउने गरेको ठाकुरले बताए । यस पटक यो भीड अझ बढने अनुमान गरिएको छ ।
जिल्ला सदरमुकाम राजविराजबाट आउने बाटो संघ सरकारमार्फत ठेक्का लागेपनि अलपत्र रहेको हुँदा अवस्था जिर्ण रहेको छ । गाउँपालिका अध्यक्ष चौधरीले मन्दिर पुग्ने अन्य बाटो पनि दशैमा सहज बनाउन मर्मत गरिने बताए ।
बिहान ८ बजेदेखि दिउँसो २ बजेसम्म अत्याधिक भीड हुने भएकाले त्यही अवधिमा भक्तजनलाई बढी सतर्कता अपनाउन अनुरोध गरेको छ ।
मन्दिर समितिले भीआइपीलाई बिहान ८ बजेसम्म पास लिएर पूजा सम्पन्न गर्न आग्रह गरेको छ ।
