राजविराज । नेपाली कांग्रेसको विद्यार्थी संगठन नेपाल विद्यार्थी संघ (नेवि संघ), सप्तरीले निर्वाचन आचारसंहिता उल्लंघन गर्ने पक्षलाई कार्वाही गर्न माग गरेको छ ।
सप्तरी जिल्लामा व्यापक आचारसंहिता उल्लंघन भइरहेको भन्दै नेवि संघले आज निर्वाचन आचारसंहिता अनुगमन समितिलाई निवेदन बुझाउँदै कार्वाही गर्न माग गरेको हो ।
जिल्लाको बिभिन्न स्थानमा विशेष गरी जनमत पार्टी, राष्ट्रिय स्वतन्त्र पार्टी, जसपा नेपाल र स्वाभिमान पार्टीको तर्फबाट आचारसंहिता विपरित काम गरिरहेको निवेदनमा उल्लेख गरिएको छ ।
सार्वजनिक स्थल, विद्युतका पोल र अनुमति बिना नीजि घरहरुमा तोकिएको मापदण्ड विपरितका ठूला व्यानर र झण्डाहरुको प्रयोग गरिरहेको, आचारसंहिताले निषेध गरेका सबारी साधन र ध्वनी उपकरणहरुको प्रयोग गरी जनजीवन प्रभावित पारेको र आचारसंहिताले निषेध गरेका सबारी साधन र ध्वनी उपकरणहरुको प्रयोग गरी मतदाताहरुलाई प्रभावित बनाउने काम गरिरहेको निवेदनमा भनिएको छ ।
निर्वाचनको गरिमालाई कायम राख्न र सबै दलहरुका लागि समान प्रतिस्पर्धाको वातावरण सुनिश्चित गर्न यस्ता गतिविधीहरु रोकिनु आवश्यक रहेको जनाउँदै निवेदनमा भनिएको छ, ‘यस बिषयमा तत्काल स्थलगत अनुगमन गरी आचारसंहिता उल्लंघन गर्ने पक्षलाई आवश्यक कानुनी कार्वाही गर्न र अवैध प्रचार सामग्रीहरु हटाउन हुन बिनम्र अनुरोध गर्दछौं ।’
जिल्ला अध्यक्ष राकेश ठाकुरको नेतृत्वमा गएका नेवि संघका नेताहरुले अनुगमन समितिका सदस्य समेत रहेका कोष तथा लेखा नियन्त्रण कार्यालयका प्रमुख मनोज कुमार सुनुवारलाई निवेदन बुझाएका हुन् ।
