राजविराज । बाम–लोकतान्त्रिक गठबन्धन इमान्दारिताका साथ चुनावमा जाने नेताहरुले बताएका छन् ।
सप्तरी क्षेत्र नम्बर २ (क) अन्तर्गतका गठबन्धनका नेताहरुले आफ्ना उम्मेदबारहरुलाई जसरी पनि जिताउन सबै लागिपर्नुपर्ने बताए ।
राजविराजस्थित जिल्ला समन्वय समितिको हलमा मंगलबार आयोजना गरिएको गठबन्धनमा आबद्ध दलका अगुवा कार्यकर्ता भेलामा नेताहरुले गठबन्धन एक भएर चुनावमा जाने बताए । उनीहरुले गठबन्धनको मत यो क्षेत्रमा सबैभन्दा बढी रहेकाले आफ्ना उम्मेदबारहरु जित्नेमा जोड् दिए ।
कार्यक्रममा नेपाली कांग्रेस, नेकपा माओवादी केन्द्र, लोकतान्त्रिक समाजवादी पार्टी (लोसपा) र नेकपा एकीकृत समाजवादी पार्टीका नेताहरुको सहभागिता थियो ।
कांग्रेसका जिल्ला सचिव सनत मण्डल, क्षेत्रिय अध्यक्ष महानन्द यादव, लोसपाका जिल्ला अध्यक्ष सुनिल झा, नेता शम्भु यादवसहितकाले गठबन्धनका उम्मेदबारको जित सुनिश्चित रहेको बताए ।
यो गठबन्धनबाट सप्तरी–२ मा प्रतिनिधीसभाका लागि जयप्रकाश ठाकुर, २ को क बाट सरोज मण्डल र २ का ख बाट उमेश यादव उम्मेदबार छन् ।
कार्यक्रममा बोल्दै उम्मेदबारहरुले आफूहरु यो क्षेत्र र जनताका लागि सधैं काम गरिरहने बताए । उनीहरुले विकासको लहर ल्याउन र जनताको अधिकार दिलाउन आफूहरुले कुनै कसर बाँकी नराख्ने बताए ।
