मनोज मोरबैता
राजविराज, २८ कात्तिक ।
आगामी मंसिर ४ गते हुने प्रतिनिधि र प्रदेशसभा सदस्य पदमा उम्मेदबारी दिएकाहरुले घरदैलो, चुनावी सभा र प्रचार प्रसारलाई तीव्र बनाएका छन् । तर, सप्तरी–२ का जनताहरु अब कसैको आश्वासनमा नपर्ने र राम्रा उम्मेदबारलाई मत दिने बताउँछन् ।
सप्तरी–२ मा चार वटा पालिका छ । यी पालिकाको अवस्था पहिलाभन्दा सुध्रिन सकेको छैन् । राजविराज नगरपालिका, महादेवा, छिन्नमस्ता र तिलाठी कोइलाडी गाउँपालिका छ ।
अन्य स्थानको तुलनामा महादेवामा अपेक्षाकृत रुपमा विकास नभएको जनाउँदै उम्मदेवारहरुले आफूलाई भोट दिए यस क्षेत्रमा विकासका ठूलाठूला योजना ल्याइदिने आश्वासन बाँड्ने गरेको स्थानीय बताउँछन् । बाटो निर्माण, सिँचाइका ठूला आयोजना र ठूला अस्पताल निर्माण गरिदिने आश्वासन दिँदै हिँडेका उम्मेदबारले मतदाताको मन भने आकर्षित गर्न सकिरहेका छैनन् । स्थानीयवासीले विभिन्न उम्मेदवारका आश्वासनभन्दा पनि समयमै मलखाद्य, बीउबिजन र किसान कार्डसहित युवाका लागि रोजगारीको व्यवस्था हुनुपर्ने अपेक्षा गरेका छन् ।
अन्न भण्डारका रुपमा रहेको महादेवामा समयमा मल, बीउ, किसान कार्ड उपलब्ध गराउने उम्मेदवारलाई चयन गर्ने उनीहरुको भनाइ छ ।
महादेवा गाउँपालिका–२ महादेवाका ७० वर्षीया हरिनन्दन अधिकारीले बर्सेनी मल र बीउका लागि आफूहरुले सास्ती भोग्दै आएको बताए । उनी अझै पनि सीमावर्ती भारतीय बजार कुनौलीको भर पर्नुपरेको सुनाए । विगतमा यस क्षेत्रबाट जितेका जनप्रतिनिधीले आफूहरुको समस्याप्रति कुनै चासो नदिएको उनको गुनासो छ ।
सरकारी सुविधा आएपनि तिनै जनप्रतिनिधीका आफन्त र आसपासका व्यक्तिले पाउने गरेको र आफूहरु टुलु–टुलु हेर्न बाध्य भएको उनले बताए । उनी जसले सहज रुपमा मल र बीउबिजन उपलब्ध गराउने प्रतिबद्धता गर्छन् उनैलाई मत दिने अधिकारी बताउँछन् ।
राजविराज नगरपालिकाको पर्साहीको ७४ वर्षीय कुशेश्वर मण्डल घाँस काटिरहेका थिए । उनले भने, ‘यत्रो उमेरसम्म घाँस नै काटिरहेको छु । आफ्नो त आफ्नो परिवारका सबैको हालत यस्तै छ । विगतमा ज–जसलाई जिताएँ कसैले पनि हामीलाई हेरेनन् ।’
राजविराज नगरपालिका–१४ का कलानन्द मण्डल उम्मेदवालाई ठूला विकासे योजनाभन्दा पनि कृषकको समस्यालाई ध्यानमा राखेर एजेण्डा बनाउनेलाई मत दिने बताए । ‘चुनाव त एक दिनमै सकिन्छ, तर कृषि कर्म बर्षभरि नै गरिन्छ’ उनले भने, ‘कृषकको समस्या बुझ्ने व्यक्तिलाई नै मत दिन्छौं ।’
राजविराज नगरपालिका, महादेवा गाउँपालिका, छिन्नमस्ता गाउँपालिका र तिलाठी कोइलाडी गाउँपालिकासहित वडा ३७ वटा रहेको यस निर्वाचन क्षेत्रमा ९५ हजार तीन सय ३५ मतदाता छन् ।
यस क्षेत्रमा सत्ता–गठबन्धनबाट लोसपाका जयप्रकाश ठाकुर, एमाले जसपा गठबन्धनबाट जसपा अध्यक्ष उपेन्द्र यादव र जनमत पार्टीका अध्यक्ष डा सीके राउतलगायत नेताले प्रतिनिधिसभा सदस्यका लागि उम्मेदवारी दिएका छन् ।
