राजविराज । सप्तरीमा होली पर्वका दिन आफ्नै सालीलाई रंग लगाउन नदिँदा कुटाकुट भएको छ । आफ्नै सालीलाई रंग लगाउन खोज्दा स्थानीय केहि युवाले एक युवकलाई कुटपिट गरेका छन् भने कुटिएका व्यक्तिले पनि आफ्नो गाउँबाट युवक बोलाएर कुटनेहरुलाई कुट्न लगाएका छन् ।
घट्ना जिल्लाको महादेवा गाउँपालिकाको हो । गाउँपालिकाको वडा नम्बर १ बस्ने २५ बर्षीय योगेन्द्र सरदार होली पर्वका दिन मंगलबार सोही गाउँपालिकाको वडा नम्बर १ चिम्टीस्थित आफ्ना ससुराली आएका थिए ।
उनले आफ्नी सालीलाई घरबाहिर रंग लगाउन खोज्दा स्थानीय केहि युवकले कुटपिट गरेका थिए ।
स्थानीय युवकले कुटपिट गरेपछि योगेन्द्रले आफ्नो गाउँबाट ८०÷९० जना साथीलाई बोलाएपछि ग्यांग फाइट नै भएको थियो । कुटपिटमा संलग्न दुई जनालाई पक्राउ गरिएको र फरार भएका योगेन्द्रसहित अन्यको खोजी भइरहेको सप्तरी प्रहरीका प्रबक्ता एवं डीएसपी नरेशकुमार सिंहले जानकारी दिए ।
दुई पक्षबीच भएको झैझगडामा घाइते भएकाहरुको स्थानीय मेडिकलमा उपचार भइरहेको प्रहरीले जनाएको छ । यस सम्बन्धमा अन्य अनुसन्धान भइरहेको प्रहरीले जनाएको छ ।
