राजविराज । सप्तरीको तिरहुत गाउँपालिकामा शुक्रबार दिउँसो भएको आगलागीका पीडितहरुलाई गाउँपालिकाले राहत बितरण गरेको छ ।
गाउँपालिकाको वडा नम्बर ५ लोहजारामा विद्युत सर्ट भएर शुक्रबार आगलागी हुँदा ६ परिवारको १४ घर जलेर नष्ट भएको थियो ।
गाउँपालिका अध्यक्ष विजय यादवको नेतृत्वमा शनिबार गएको टोलीले अग्निपीडितलाई राहत बितरण गरेको हो ।
टोलीले प्रति परिवार २ बाल्टिन, दुई हण्डी, २ कराही, २ करछुल, २ ग्लास, एउटा जग, १० किलो दाल, २ किलो प्याज, दुई लिटर तेल, ५० किलो चामल, ४ वटा साडी, २ वटा झुल, धोती, कुर्ता, गन्जी, नुंगी २÷२ वटाका दरले तथा नून, बेसार समेत प्रदान गरेको छ ।
गाउँपालिका अध्यक्ष यादवले अग्निपीडितलाई भएको समस्यालाई मध्यनजर गर्दै तत्कालै राहत उपलब्ध गराइएको बताए । उनले आगलागीबाट सबैलाई सचेत रहनुपर्ने बताए ।
शनिबारै राजविराजबाट गएको सुभाष भन्सालीले अग्निपीडित परिवारलाई साडी र धोती २÷२ वटा तथा एक प्याकेट बिस्कुट राहत स्वरुप उपलब्ध गराएका छन् ।
स्थानीय राम किसुन मैरता यादवको घरमा विद्युत सर्ट भएर आगलागी भएको थियो । आगलागीले झण्डै रु ५० लाख बराबरको क्षति भएको छ ।
