राजविराज । मधेश प्रदेशका शिक्षा, विज्ञान प्रविधी तथा बाणिज्य मन्त्री महेश प्रसाद यादवले समाजमा बिकृति, विसंगति दिनप्रतिदिन बढ्दै गएको बताएका छन् । बिकृति, विसंगति बढ्दै जानु चिन्ताको बिषय भएको उनको भनाई छ ।
सप्तरी सामुदायिक केन्द्रको पाँचौ साधारणसभालाई शनिबार राजविराजमा उद्घाटन गर्दै मन्त्री यादवले युवाहरु दुव्र्यसनीको बाटोमा हिंडिरहेको चोरी जस्ता समस्या बढिरहेको बताए । उनले समाज साक्षर नभएसम्म विकृति बढिनै रहने बताए ।
जिम्मेबार अभिभावकले आफ्नो परिवारबाटै यस्ता समस्या समाधान गर्नुपर्नेमा जोड् दिदैं उनले आ–आफ्ना बालबालिकालाई शिक्षा दिनुपर्ने बताए । उनले घर अगाडि नै सामुदायिक विद्यालय भएपनि कतिपय अभिभावकले आफ्ना बालबालिकालाई विद्यालय नपठाइरहेको बताउँदै भने, ‘शिक्षामा अझै आकर्षण बढेको अवस्था छैन् ।’
उनले सदरमुकाम राजविराजको विकासका निम्ति विज्ञ बनाएर योजना तयार गर्न कार्यबाहक मेयरसहित वडाअध्यक्षहरुलाई आग्रह गरेपनि ध्यान नदिएको गुनासो गरे ।
मन्त्री यादवले बिभिन्न आपत विपतको समयमा सप्तरी सामुदायिक सेवा केन्द्रले खेलेको भूमिकाको प्रशंसा गरे ।
जिल्ला समन्वय समितिका प्रमुख शिबनारायण साहले एकले अर्कालाई सहयोग नगेसम्म समाज चल्न नसक्ने भएकाले सबैले सेवाको भावना राख्नुपर्ने बताए ।
जिल्ला प्रहरी कार्यालयका प्रमुख एसपी नरेन्द्र कुमार कार्कीले समाजमा देखापरेको विकृति, विसंगतिलाई रोक्न सबैले सहयोग गर्नुपर्ने बताए ।
राजविराजको विकास निर्माणमा एकदमै सुस्तता रहेको भन्दै उनले समस्या हटाएर कसरी राम्रो बनाउनेतर्फ सबैले ध्यान दिनुपर्ने बताए ।
सामुदायिक सेवा केन्द्रका अध्यक्ष हितनारायण लाल दासको अध्यक्षतामा आयोजित साधारणसभाको उद्घाटन सत्रमा नेपाल पत्रकार महासंघ, सप्तरीका अध्यक्ष श्रवणकुमार देव, इन्सेक प्रतिनिधी मनोहर पोखरेल, प्याव्सन अध्यक्ष अरुण देव, महिला अधिकारकर्मी अनिता देबकोटा, मिलाफकी अध्यक्ष रमिला साहसहितकाले मन्तव्य व्यक्त गरेका थिए ।
कार्यक्रमको संचालन सेवा केन्द्रका सचिव संजय शर्माले गरेका थिए भने सल्लाहकार थानसिंह भन्सालीले स्वागत मन्तव्य व्यक्त गरेका थिए ।
