राजविराज । व्यवसायीको अवस्था कमजोर भइसकेको राज्य पक्षले पनि बुझेको छ । तर, यसप्रति कुनै चासो देखाउन नसक्दा व्यवसायीको हालत खस्किदैं गएको छ । उनीहरुको व्यवसाय नचल्दा र बैंकले व्याजदर बढाउँदै लग्दा व्यवसायी त्राहिमामको स्थितिमा पुगेका छन् । उनीहरु कर तिर्ने अवस्थामा पनि छैनन् ।
यहीं भएर होला कर कार्यालयका हाकिमले शनिबार राजविराजमा आयोजित एक कार्यक्रममा व्यवसायीसँगै आफ्नो बाध्यता पनि सुनाए । करदाता सेवा कार्यालय, राजविराजका प्रमुख डिल्लीरमण भण्डारीले भने, ‘कर तिर्न भन्दा व्यवसायीले मारे मार्नुस्, काटे काट्नुस तर कर तिर्ने अवस्थामा छैनौं भनिरहनुभएको छ ।’
उनले कर नतिरेका व्यवसायीलाई फोन गरेर तथा पत्र काट्दा समेत कर नतिरिरहेको बताए । ‘व्यवसायीले मारे मार्नुस, काटे काट्नु भनिरहनुभएको छ’ उनले भने ।
सप्तरी उद्योग बाणिज्य संघले आयोजना गरेको कार्यक्रममा उनले आफैंले गर्न सक्ने कामका लागि पनि अरु देशसँग परनिर्भर भएका कारण व्यवसाय कमजोर बन्दै गएको बताए । उनले गुलावको फूल, जनैजस्ता सामान आफ्नै देशमा उत्पादन गर्न सकिए पनि अरु देशबाट ल्याउँदा स्थानीय व्यवसाय कमजोर र देशको रकम अरु देशमा गइरहेको बताए ।
भण्डारीले कानुन अनुसार नै कर असुली गर्ने गरिएको बताउँदै करको दायरा बढाउने कानुन निर्माण जनप्रतिनिधीले नै गर्ने गरेको बताए । ‘हामी कानुन भन्दा बाहिर गएर कर लिन्नौं’ उनले भने ।
