राजविराज । कांग्रेस पार्टीभित्र गुट, उपगुट रहिरहेसम्म पार्टीको सुदृढिकरण हुन नसक्ने एक कार्यक्रमका बक्ताहरुले बताएका छन् ।
नेपाल ट्रेड युनियन काँग्रेस सप्तरीको शुक्रबार आयोजित सातौं जिल्ला अधिवेशन उद्घाटन सत्रमा बोल्दै बक्ताहरुले यस्तो बताएका हुन् । उनीहरुले सबैभन्दा ठूलो दल कांग्रेस भएपनि गुट, उपगुटकै कारण कमजोर बन्ने गरेको बताए ।
अधिवेसन उद्घाटन सत्रका प्रमुख अतिथि नेपाली कांग्रेसका सप्तरी सभापति रामदेव साहले लामो समयसम्म पार्टीका देखिएको गुट, उपगुटका कारण समस्या भएको बताए । उनले आफू नेतृत्वको समिति बनेपछि सबैलाई समान व्यबहार गर्दै अघि बढिरहेको बताए ।
साहले पार्टीका भ्रातृ तथा शुभेच्छुक संगठनमा देखापरेका हरेक समस्या समाधान गर्न आफूहरु तत्पर रहेको बताउँदै संगठनहरुमा कुनै किसिमको गुट, उपगुट नगरी अगाडि बढ्न आग्रह गरे ।
पार्टीका उप सभापति रामकुमार यादवले पार्टीमा कसैलाई कुनै किसिमको भेदभाव नगरी आफूहरु अगाडि बढ्न तयार रहेको बताए । उनले पछिल्लो समयमा आफू कुनै न कुनै रुपमा जिल्ला समितिमा रहँदै आएको चर्चा गर्दै हरेक कार्यकर्तालाई समान व्यबहार गर्ने बताए ।
उनले पार्टीलाई मजबुत बनाउन सबैलाई भूमिका खेल्नुपर्नेमा जोड् दिदैं गुट, उपगुट त्याग्न सबैसँग आग्रह गरे ।
पार्टीका सचिव सनत कुमार मण्डलले केन्द्रीय नेतृत्वले मधेशमा पार्टीलाई कमजोर बनाउन लागिपरेको बताए । उनले गठबन्धनको नाममा नेता÷कार्यकर्तालाई कमजोृर बनाउने खेल भइरहेको भन्दै यस्तै अवस्था रहे कार्यकर्ता खोज्ने सम्मको समय आउन सक्ने बताए ।
पार्टीका अर्का सचिव प्रभुनारायण चौधरीले पार्टीलाई मजबुत बनाउन सबैले ध्यान दिनुपर्ने बताए ।
कार्यक्रममा पार्टीका संगठन विभाग प्रमुख बद्रीनारायण महात्मान यादव, अनुशासन विभाग प्रमुख बुदुर राम, नेता उमेश मिश्र, कमल परियारसहितकाले मन्तव्य व्यक्त गरेका थिए ।
ट्रेड यूनियन कांग्रेस, सप्तरीका अध्यक्ष मनोज कुमार मण्डलको अध्यक्षतामा उद्घाटन सत्रको आयोजना गरिएको थियो ।
