राजविराज । सप्तरी सदरमुकाम राजविराजस्थित कारागारको अतिक्रमित जग्गा खाली गर्न १५ दिनको समय दिइने भएको छ ।
कारागारको राजविराज ७ स्थित कित्ता नम्बर ४१५ को २ बिघा १३ कट्ठा १९ धुर जग्गामध्ये १ बिघा ६ कठ्ठा १२ धुर लामो समयदेखि अतिक्रमण गरिएको छ । जग्गा अतिक्रमण गरि केही ब्यक्ति घर बनाएर बस्दै आएका छन् ।
शुक्रबार कारागारमा आयोजित सर्वपक्षीय बैठकले जग्गा अतिक्रमण गर्नेलाई खाली गर्न १५ दिनको समय दिइने निर्णय गरेको छ । अतिक्रमण गरिएको जग्गा खाली गर्न जिल्ला प्रशासन कार्यालयले १५ दिनको सूचना जारी गर्नेछ ।
सूचना जारी गरिएको समयमा पनि खाली नगरिए कानुन अनुसार खाली गरिने निर्णय गरिएको छ ।
कारागारको आफ्नै जग्गा हुँदा पनि अतिक्रमण गरिएका कारण थप भवन बनाउन नसक्दा कैदीलाई कोचेर राख्नुपरेको जेलर किशोर रामले बताए । १५५ जना कैदी राख्ने क्षमता रहेको कारागारमा अहिले ४०६ जना रहेको उनले बताए ।
क्षमताभन्दा बढी कैदी रहदा कोचिएर राख्नुपरेको र नुहाउन, शौच गर्न समस्या भैरहेको बताउदै रामले
अर्को ब्ल्क थप्नुपर्ने बताए ।
प्रमुख जिल्ला अधिकारी भूपेन्द्र थापाले कारागारकाे नाममा रहेको जग्गा अरूले प्रयोग गर्नु गैर कानुनी रहेको बताउदै खाली गर्नैपर्ने बताए ।
उनले जग्गा नभएका नागरिकलाई सरकारले भुमि अधिकार आयोग गठन गरि जग्गा दिइरहेको बताउदै यो प्रक्रियामा जानुपर्ने बताए ।
उनले स्थानीयभन्दा पनि बाहिरका ब्यक्ति आएर जग्गा अतिक्रमण गरेको देखिएकोले कानुन मिच्न कसैले नमिल्ने बताए ।
