राजविराज । फौजदारी अभियोगमा थुनिएका एक व्यक्ति मिलापत्रकै आधारमा रिहा भएका छन् ।
राजविराज ४ निवासी दिबाकर साहले दिएको ठगी तथा अपराधिक विश्वासघात जाहेरीको आधारमा जिल्ला अदालतमा मुद्दा समेत दर्ता रहेको अवस्थामा पक्राउ परेका एक व्यक्ति मिलापत्रकै आधारमा रिहा भएका हुन् ।
साहले राजविराज ४ मा आफ्नो घर निर्माण शुरु गरेका थिए । मारुती सिमेन्टको प्रयोग गरी घर बनाउने क्रममा उनको घरको सिंढी भत्कियो । यसपछि मारुती कम्पनीसँग रु २५ लाख क्षतिपूर्ती लिने सहमति गरेका उनले पुनः मारुती कम्पनीका प्रोप्राइटर नन्दकिशोर राठी, उनका छोरा अनुज राठी, कम्पनीका सेल्स म्यानेजर ज्याती जोशीसहित ७ जनाबिरुद्ध ठगी (अपराधिक विश्वासघात) सम्बन्धी कसुरमा जिल्ला सरकारी वकीलको कार्यालय मार्फत् मुद्दा दर्ता गराएका थिए । ्
मुद्दा दर्तापछि जिल्ला प्रहरी कार्यालय, सप्तरीबाट गएको एक टोलीले १२ असारको राति सेल्स म्यानेजर जोशीलाई पक्राउ गरी ल्याए ।
जोशीसहित सातै जनाबिरुद्ध मुद्दा दर्ता भई सप्तरी जिल्ला अदालतबाट अन्तिम पटक सात दिनको म्याद थप भएको समय बाँकी रहँदा नै दिबाकरले उद्योग बाणिज्य संघको रोहबरमा सहमति गरेपछि फौजदारी मुद्दामा थुनिएका ज्योति जोशीलाई प्रहरीले छाडिदिएको छ ।
यसअघि मिलापत्रबारे जानकारी पाएको र मुद्दा चलिरहेकाले छाड्न नमिल्ने बताएका सप्तरी प्रहरी प्रमुख एसपी नरेन्द्र कुमार कार्कीले जिल्ला सरकारी वकील कार्यालयको रायमा छाडिएको बताएका छन् ।
मिलापत्र भएर फायल जिल्ला प्रहरी कार्यालयमा पुगेपछि जिल्ला प्रहरी कार्यालयले जिल्ला सरकारी वकील कार्यालयसँग राय मागेको थियो । ‘दिवाकर कुमार साहको जाहेरीले वादी नेपाल सरकार, प्रतिवादी ज्योति जोशी समेत रहेको ठगी तथा विश्वासघात मुद्दामा जिल्ला प्रहरी कार्यालय, सप्तरीको च.नं. ९५३१ मिति २०८० असार २६ गतेको माथबर व्यक्तिको जिम्मामा छाड्न सहमति दिने बिषयको पत्र प्राप्त भई व्यहोरा अवगत भयो’ जिल्ला सरकारी वकीलको कार्यालयले प्रहरीलाई दिएको पत्रमा भनिएको छ, ‘निजलाई हाजिरी जमानीमा छाड्ने सहमति प्रदान गरिएको छ । बाँकी अनुसन्धानको काम गर्न गराउन निर्देशन दिइएको छ ।’
