राजविराज । नेकपा एमालेका नेताहरु सबार गाडी दुर्घटनामा नयाँ ट्वीस्ट आएको छ । ती गाडी सरकारी रहेको खुलेको छ ।
एमाले नेताहरु सबार दुर्घटनामा परेको गाडी सप्तरीको कंचनरुप नगरपालिकास्थित कंचनपुर शहरी खानेपानी तथा सरसफाई आयोजनाको रहेको खुलेको हो ।
नेकपा एमालेका नेताहरु चढेको बा.प्र ०१–०२७ च ७६४७ नम्बरको उक्त गाडी अग्निसाइर कृष्णासवरण गाउँपालिका वडा नम्बर १ जण्डौल नजिकै शुक्रबार दुर्घटनामा परेको हो ।
कंचनरुपबाट एमाले जिल्ला बैठकमा सहभागी हुन सदरमुकाम राजविराजतर्फ आउने क्रममा उक्त गाडी दुर्घटनामा परेका हुन् । दुर्घटनामा एमाले जिल्ला कमिटी सदस्यहरू हरिहर बस्नेत, भुवन केसी, सुनिता कटुवाल, किरण पन्थ र बच्चुलाल चौधरी घाइते भएका हुन् । उनीहरुको राजविराजस्थित अस्पतालमा उपचार भइरहेको छ ।
उनीहरुलाई बैठकमा आउन खानेपानी तथा सरसफाई आयोजनाले गाडी उपलब्ध गराएको थियो । एमाले जिल्ला सदस्य भुवन केसी यो संस्थाका अध्यक्ष हुन् ।
कार्यालय प्रमुख इन्जिनियर हरिनारायण चौधरीले कार्यालयको कामका लागि जान्छु भनेर अध्यक्षले गाडी लिएको बताए । ‘कार्यालयको कामको लागि जानुछ भनेर उहाँ –अध्यक्ष) ज्यूले गाडी लिनुभएको छ’ चौधरीले भने, ‘गाडी दुर्घटना भएपछि मात्रै आफूलाई जानकारी आएको छ ।’
दुर्घटनामा परेको गाडी अहिले इलाका प्रहरी कार्यालय महुलीमा राखिएको छ । दुर्घटना भएपछि गाडीको मर्मत गराउन लाखौं खर्च हुने देखिएको छ । कार्यालय प्रमुख चौधरीले कति खर्च हुन्छ भनेर यकीन गर्न नसकिएको र प्राविधिकलाई देखाएपछि मात्रै जानकारी हुने बताए ।
