राजविराज । संचार सम्बन्धी बिभिन्न संघ–संस्थाले जनकपुरधामका पत्रकार सिबेन्द्र रोहितामाथि आक्रमण गरी गम्भीर घाइते बनाउनेलाई कार्वाही गर्न माग गरेको छ ।
आमसंचार प्राधिकरणका अध्यक्ष श्याम सुन्दर यादव र नेपाल पत्रकार महासंघ धनुषाकी अध्यक्ष मनिका झाले मंगलबार छुट्टाछुट्टै बिज्ञप्ती जारी गरी आक्रमणकारी जोकोही भएपनि कानूनी दायरामा ल्याउन स्थानीय प्रशासनसंग माग गरेका छन् । उनीहरुले यो कार्यको भत्र्सना गर्दै दोषीलाई अबिलम्ब कानुनी दायरामा लिन माग गरेका छन् ।
सोमबार सांझ जनकपुरधामको भानु चोकमा पत्रकार रोहितामाथि एक समूहले आक्रमण गरेको थियो । आक्रमणमा परी घाइते रोहितालाई थप उपचारका लागि काठमाडौं लगिएको छ ।
धनुषाको धनौजी गाउँपालिकाका प्रमुख प्रशासकीय अधिकृत रंजित यादव चढ्ने बा १२ च ४२४३ नम्बरको स्कारपियो गाडी चढेर ५÷६ जनाको समूहले पत्रकार रोहितामाथि आक्रमण गर्न पुगेका थिए । आक्रमणमा अधिकृत यादवका सहोदर भाई सुनिल अधिकारी समेत थिए ।
पत्रकारमाथि आक्रमण भइरहँदा स्थानीयले प्रतिकार गर्दै आक्रमणकारीलाई लखेटेपछि उनीहरू स्कारपियो गाडी छाडेर भागेका थिए । अहिले गाडी प्रहरीको नियन्त्रणमा छ ।
गाउँपालिकामा भइरहेको अनियमितता विरुद्ध समाचार लेखेकै कारण अधिकृत यादवले आफूमाथि आक्रमण गर्न लगाएको पत्रकार रोहिताले बताएका छन् । उनले भने, ’समाचार डिलिट गर्न पटक पटक दवाव दिएको थियो । तर म नमानेपछि भानु चोकमा गुण्डा पठाएर मेरो ज्यानै लिन खोज्यो ।’
