राजविराज । राजविराज नगरपालिकाका जनप्रतिनिधी बर्षाैदेखिको अतिक्रमण हटाउन तत्परता देखाएका छन् ।
दुई दिनअघि राजविराज हटियाको अतिक्रमण हटाएको जनप्रतिनिधीले सिरहा रोडको अतिक्रमण हटाउन सूचना जारी गरेका छन् । हुलाकी राजमार्ग अन्तर्गत राजविराज नगरपालिकाको वडा नम्बर ६ र ७ स्थित राम मन्दिरदेखि छिन्नमस्ता डेरीसम्म सडकको सेन्टर प्वाइन्टदेखि उत्तर र दक्षिणतर्फ ९–९ मिटर गरी जम्मा १८ मिटर क्षेत्रभित्र परेको घर, टहरा लगायत कुनै किसिमले ओगटेको क्षेत्रलाई ७ दिनभित्र खाली गर्न सूचना जारी गरेको छ ।
आईतबार नगरपालिकाका निमित्त प्रमृुख प्रशासकीय अधिकृत निरञ्जन प्रसाद यादवले सूचना जारी गर्दै अतिक्रमण हटाएर सहयोग गरिदिन सबैसँग आग्रह गरेका हुन् ।
तोकिएको मितिभित्र अतिक्रमण नहटाइए कानुन बमोजिम अघि बढ्ने जनप्रतिनिधीले बताएका छन् ।
राजविराज नगरपालिकाको हटियाभित्रको अतिक्रमण हटाएपछि सिरहा रोडमा रहेको अतिक्रमण हटाउन जनप्रतिनिधीलाई दवाव बढेको थियो ।
