मधेश सम्वाददाता
राजविराज, २६ बैशाख ।
धनुषाको कमला नगरपालिका वडा नम्बर ४ । सोमबार रातिको करिब ७ः३० बजेको समय । ज.१च ६४२ नम्बरको गाडी गुडिरहेको छ । गाडीमा नेकपा एकीकृत समाजवादीका उम्मेदबारको व्यानर टाँगिएको छ । यो गाडीमा उम्मेदबारले प्रचार प्रसार गरिरहेको सर्वसाधारणको बुझाई छ । स्थानीय केहि युवा रोक्छन् । गाडीमा सबार भएका व्यक्तिहरुले पनि रोकिदिन्छन् । गाडीको पछाडिको भागमा मात्र रक्सीका कार्टुन थुपारिएको देखेपछि हो–हल्ला हुन्छ । गाडीमा सबार सबै जना खेतैखेत भाग्छन् ।
यो गाडीमा नेकपा एकीकृत समाजवादी पार्टीबाट कमला नगरपालिका वडा नम्बर ५ को वडाअध्यक्ष पदमा उम्मेदबारी दिएका शिवा पासवान आफ्ना कार्यकर्तासहित जाँदै थिए । त्यहीं क्रममा युवाहरुले रोकेपछि उनको गाडीभरी रक्सी नै रक्सी बोकेको फेला प¥यो । कमसल किसिमको ४० रुपैयाँमै एक बोतल पाइने रक्सी राति राति गाउँका युवालाई दिनका लागि लगिरहेको सुइँको पाएपछि यो गाडीलाई रोकेको स्थानीय युवा रमेश यादवले बताएका छन् ।
युवाले उम्मेदबारको गाडीमा रक्सी फेला पारेपछि वडाअध्यक्ष पदका उम्मेदबार पासवानसहित उनका कार्यकर्ता खेतैखेत भएर भागेका छन् । युवाहरुले रक्सी प्रहरीको जिम्मा लगाएका छन् । इलाका प्रहरी कार्यालय खजुरीको टोलीलाई रक्सी जिम्मा लगाइएको यादवले बताए ।
स्थानीय तहको निर्वाचनको समय नजिकिदैं जाँदा उम्मेदबारहरुले जनतालाई रक्सी, मासुका साथै नगद बितरण गर्न थालेका छन् ।
कमला नगरपालिकामै जनता समाजवादी पार्टी (जसपा) का उम्मेदबारले रातिको समयमा स्थानीयलाई रक्सी बितरण गरिरहेको भिडियो सार्वजनिक भएको छ । जसपाबाट पार्टीका मेयर पदका उम्मेदबार पशुपति यादवको प्रचार प्रसारको व्यानर झुण्डयाइएको ट्याक्टरबाटै युवाहरुलाई रक्सी बितरण गरिएको छ । एक स्थानीयका अनुसार घरदैलो अभियानमा खटिने कार्यकर्तासहित गाउँका अन्यलाई पनि रिझाउन रक्सी बितरण गर्ने गरिएको छ । उनका अनुसार शरीरमा क्षति पु¥याउने कमसल किसिमको रक्सी उम्मेदबारले प्रायः दैनिक बितरण गरिरहेका छन् ।
धनुषाका प्रमुख जिल्ला अधिकारी सुरेन्द्र पौडेल निर्वाचनमा रक्सी बितरण गर्नु आचारसंहिता विपरित काम भएको बताए । उनले यस्तो काम गर्ने उम्मेदबारको बारेमा बुझेर निर्वाचन आयोगमा आचारसंहिता उल्लंघन गरेको बारेमा जानकारी गराउने बताए ।
