राजविराज । सप्तरीको दोश्रो पालिका पनि बालविवाह मुक्त घोषणाको तयारी शुरु गरेको छ । जिल्लाको खडक नगरपालिका बालविवाह मुक्त घोषणाको तयारी शुरु गरेको हो ।
नगरपालिकाले आइतबार बालविवाहविरुद्धको बृहत अभियान शुरु गरेको छ ।
नगरपालिकासहित सबै वडामा छुट्टाछुट्टै कार्यक्रम गरी एकैसाथ बालविवाहविरुद्धको अभियान प्रारम्भ गरेको हो । ११ बजेको समयमा नगरपालिकाको ११ वटै वडाका ११ हजार जनता मार्फत यो अभियान शुरु गरिएको नगरपालिकाका प्रमुख जयप्रकाश चौधरीले जानकारी दिए ।
उनका अनुसार बालविवाह नगर्ने र गर्न नदिने मुल नारासहित यो अभियान प्रारम्भ भएको छ ।
नगरपालिकाको कार्यालय प्राङ्गणमा आयोजित कार्यक्रमका बक्ताले अभियानलाई सशक्त तरिकाले अगाडि बढाउनुपर्नेमा जोड दिए ।
कार्यक्रमका प्रमुख अतिथि प्रदेश सांसद माला कर्णले अभियानले सार्थकता पाउने विश्वास व्यक्त गरिन ।
सेभ द चिल्ड्रेनको सहयोग, सबल नेपालको साझेदारीमा नगरपालिकाले यो अभियान प्रारम्भ गरिएको छ ।
यसअघि जिल्लाको सुरुङा नगरपालिका बालविवाह मुक्त घोषणा भैसकेको छ ।
