राजविराज । लामो समयदेखि फोहोर रहेको राजविराज ७ स्थित भगवती मन्दिर पछाडिको पोखरी मंगलबार सरसफाई गरिएको छ ।
राजविराजको मुटु मानिने यो पोखरी सरसफाई गर्न प्रमुख जिल्ला अधिकारीदेखि सबै सुरक्षा निकायका प्रतिनिधी, जनप्रतिनिधी, स्थानीय युवा समेतले सहभागिता जनाएका थिए ।
राजविराज नगरपालिकाको प्रमुख प्रशासकीय भएर तेस्रो पटक आएपछि बिष्णु गुरुङले यो पोखरीमा सरसफाई गर्न सबै क्षेत्रको सहयोग पाएका हुन् । यसअघि राजविराज नगरपालिकामा आएर बिभिन्न विकासीय काम गरेका र अतिक्रमण हटाउन सकेका गुरुङ कुरुप देखिन थालेका पोखरीको सरसफाईमा अग्रसरता देखाएका हुन् ।
यसअघि उनले गरेका कामबाट स्थानीयले खुशी व्यक्त गरेका थिए । उनले पुरानै तरिका अनुसार सरसफाईका साथै अतिक्रमण हटाउने र विकासीय कामलाई अगाडि बढाउनेमा स्थानीयले विश्वास व्यक्त गरेका छन् ।
मंगलबार भएको सरसफाईमा राजविराजका निलम्बित मेयर भिमराज यादव, कार्यवाहक नगर प्रमुख इसरत परविन, प्रमुख जिल्ला अधिकारी किरण थापा, बरख गण राजविराजका गणपति प्रमुख सेनानी रमेश पाण्डे, सप्तरीका प्रहरी प्रमुख एसपी नरेन्द्र कुमार कार्कीसहितका व्यक्ति, वडाअध्यक्ष, वडासदस्य समेत यहाँ पुगेका थिए ।
