राजविराज । मुलुककै प्रसिद्ध एवं चर्चित छिन्नमस्ता भगवती मन्दिरमा दाताको लहडमा परी खेलबाड गरिएको छ । मन्दिरभित्र रहेको माता छिन्नमस्ताको बर्षाै पुरानो मुकुटलाई हटाएर नयाँ लगाइएको छ ।
चार जना दाताले आफ्नो नाम उल्लेख गरी बनाइदिएको मुकुट मन्दिर समितिले लगाएको छ । कृष्णमुरारी प्याकुरेल, गोपीराज प्याकुरेल, राधा प्याकुरेल र शंकर प्याकुरेलको नाम उल्लेख गरिएको नयाँ मुकुट लगाइएको छ ।
यो मुकुट लगाइएपछि चौतर्फी बिरोध भएको छ । मन्दिर समितिले आफूखुशी माताको मुकुट परिवर्तन गरिरहेको भन्दै यसप्रति आपत्ति जनाइएको छ ।
छिन्नमस्ता गाउँपालिकाका अध्यक्ष विद्यानन्द चौधरीले मन्दिर समितिले करोडौं श्रद्धालुको आस्थामाथि चोट पु-याएको बताए । उनले अबिलम्ब यसलाई सच्याउन भनेको बताए । ‘यसलाई अबिलम्ब सच्याउन भनेको छु’ उनले भने, ‘भोली क्षमा पूजासहित पुरानै प्रतिमा लगाइने पीठाधीश महाकान्त ठाकुरले बताउनुभएको छ ।’
