राजविराज । सप्तरीको कंचनरुप नगरपालिका ९ स्थित सुन्दरी खोलामा मृत भेटिएका युवकको उनकै साथीले हत्या गरेको खुलेको छ ।
गत २१ भदौमा कंचनरुप नगरपालिका ७ बलुवा बस्ने २५ बर्षीय राहुल कुमार चौधरी मृत भेटिएका थिए । प्रहरीले उनको हत्या भएको जनाएको छ ।
उनको हत्यामा संलग्न रहेको भन्दै कंचनरुप नगरपालिका ६ बस्ने पशुपति रामलाई पक्राउ गरिएको जिल्ला प्रहरी कार्यालय, सप्तरीले जनाएको छ ।
२१ भदौमा रामले चौधरीलाई भारततर्फ लगी लागूऔषध खरीद गरी सुन्दरी खोलामा ल्याएका थिए । सप्तरी प्रहरीका प्रबक्ता एवं डीएसपी ढुण्डिराज नेउपानेका अनुसार रामले सो ठाउँमा चौधरीलाई अत्यधिक मात्रामा लागूऔषध सेवन गराई बेहोस बनाएका थिए । ‘चौधरी बेहोस भएपछि पुनः लागूऔषध जर्वजस्ती मुखमा राखी खुवाई निजको हत्या गरेको बयान रामले दिएका छन्, ‘नेउपानेले भने, ‘यसपछि चौधरीको सम्पूर्ण कपडा खोली मोवाइल र घडी लुटेर घरतर्फ गएका थिए ।’
रामलाई पक्राउ गरी सप्तरी जिल्ला अदालतबाट ७ दिनको म्याद थप गरी अन्य अनुसन्धान गरिरहेको जिल्ला प्रहरी कार्यालय, राजविराजले जनाएको छ ।
