राजविराज । सप्तरीको हनुमाननगर कंकालिनी नगरपालिकामा बिहिबारदेखि कुस्ती प्रतियोगिता शुरु भएको छ ।
नगरपालिकाको वडा नम्बर ११ सखुवामा कुस्ती प्रतियोगिता शुरु भएको हो । प्रतियोगितामा नेपाल र भारतको विभिन्न ठाउँका पहलवानले भाग लिएका छन् । पुरूष र महिला पहलवान दुबैले आ-आफ्ना समूहमा प्रतिस्पर्धा गर्नेछन् ।
बिहिबार भएको खेलमा नेपाली पहलवान लक्की थापाले भारत राजस्थानका शम्शेर पहलवानलाई पराजित गरेका छन् । अन्य प्रतिस्पर्धा भारतीय पहलवानबीच भएको छ ।
प्रतियोगितामा नेपालको विभिन्न ठाउँका साथै भारतको दिल्ली, राजस्थान, बनारस, मेरठ्सहितका ठाउँबाट पहलवान आएका छन् ।
यसअघि प्रतियोगिताको उद्घाटन सत्रमा बोल्दै बक्ताहरुले खेलकुद पनि विकासको अंग भएकाले सम्बन्धित निकायले यसतर्फ ध्यान दिनुपर्ने बताए ।
उद्घाटन कार्यक्रमलाई सम्बोधन गर्दै प्रदेश सभा सदस्य सकिल अलिले हराउदै गएको कुस्ती खेललाई जोगाउनुपर्ने बताए ।
उनले खेलकुदको आयोजना गर्दै युवाहरूलाई यसमा सहभागी गराइरहनुपर्नेमा जोड दिए ।
हनुमाननगर कंकालिनी नगरपालिकाका प्रमुख बिरेन्द्र माझीले खेलकुदको विकास गर्न नगरपालिका तत्पर रहेको बताए । उनले पछिल्लो समयमा युवाहरु कुलतको बाटोमा लागेको भन्दै अब युवाहरूलाई सहभागी गराएर खेलकुद नियमित गर्ने बताए ।
नगरपालिकाले आयोजना गरेको कुस्ती प्रतियोगिता तीन दिनसम्म चल्नेछ ।
