राजविराज । मधेश प्रदेश सरकारको शिक्षा तथा संस्कृति मन्त्री महेश प्रसाद यादवले सप्तरी जिल्लाका हरेक खेलाडीको व्यवस्थापन गरिने बताएका छन् ।
क्रिकेटर विवेक यादव र भारोत्तोलन खेलाडी संजय यादवलाई सम्मान गर्न जिल्ला खेलकुद विकास समिति, सप्तरीले मंगलबार आयोजना गरेको कार्यक्रमलाई सम्बोधन गर्दै मन्त्री यादवले उक्त कुरा बताएका हुन् ।
‘आर्थिक कारण नै खेलाडी खेलकुद छाड्न बाध्य भइरहेको अवस्था छ’ मन्त्री यादवले भने, ‘खेलाडी व्यवस्थापनका निम्ति एउटा कोष स्थापना गरिनेछ ।’
उनले स्थापना हुने कोषमा आफ्नो तर्फबाट रु १ लाख प्रदान गर्ने बताउँदै अन्य व्यक्तिहरुलाई पनि कोषमा सहयोग गर्न आग्रह गरे ।
खेलकुद सम्बन्धी विधेयक प्रदेश सभामा पेश भइसकेको बताउँदै उनले खेलकुदलाई बढी चासोका साथ अघि बढाइने बताए ।
मन्त्री यादवले जिल्ला खेलकुद विकास समितिको कार्यालय, राज रंगशालालाई राम्रो बनाउन तथा पविमाविको खेल मैदानमा क्रिकेट ग्राउण्ड बनाउन बजेट विनियोजन गरिएको भन्दै समयमै काम सम्पन्न हुने विश्वास व्यक्त गरे ।
कार्यक्रममा टि–ट्वान्टी विश्वकप क्रिकेट छनौट प्रतियोगितामा उत्कृष्ट प्रदर्शन गर्ने सप्तरीका विवेक यादव र भारोत्तोलनका राष्ट्रिय खेलाडी संजय यादवलाई सम्मानपत्र, दोसल्ला र नगदसहित मन्त्री यादवले सम्मान गरे । दुबैलाई नगद रु ५१०० सहित सम्मान गरिएको थियो ।
कार्यक्रममा सप्तरी क्रिकेट संघका अध्यक्ष एवं केन्द्रीय सदस्य आयुष श्रेष्ठ, नेपाल पत्रकार महासंघ, सप्तरीका अध्यक्ष श्रवणकुमार देवसहितकाले मन्तव्य व्यक्त गरेका थिए ।
जिल्ला खेलकुद विकास समितिका प्रमुख दिनेश कुमार भुजेलको अध्यक्षतामा कार्यक्रमको आयोजना गरिएको थियो ।
