राजविराज । सप्तरीका बालबालिकाले आफूहरूसँग सान्दर्भिक समाचार किन मिडियामा नआइरहेको भन्दै पत्रकारसँग जिज्ञासा राखेका छन् ।
सप्तरी जिल्ला बाल क्लब संजालले मंगलबार राजविराजमा आयोजना गरेको संजालका सदस्य एवं पत्रकारसँगको अन्तर्कृया कार्यक्रममा बालबालिकाले आफुहरुसँग सान्दर्भिक समाचार पत्रकारले स्पेस दिन नचाहेको गुनासो गरे ।
उनीहरुले विद्यालय नगई बालबालिका होटेल, इँटा उद्योगसहितका ठाउँमा काम गरिरहेको, विद्यालयमा राजनीति भइरहेको, बालविवाह सम्बन्धमा तथा सामुदायिक विद्यालयका शिक्षकले आफ्ना छोराछोरीलाई नीजिमा पढाइरहेकोबारे मिडियामा नआइरहेको गुनासो गरे ।
बालबालिकाको गुनासोलाई सम्बोधन गर्दै नेपाल पत्रकार महासंघ, सप्तरीका अध्यक्ष श्रवणकुमार देवले पत्रकारलाई आउने हरेक जानकारी समाचार बनिरहेको उल्लेख गरे । उनले कुनै सूचना भए पत्रकारलाई उपलब्ध गराउन बालबालिकासँग अनुरोध गरे ।
त्यस अवसरमा नेपाल पत्रकार महासंघका केन्द्रीय सदस्य ललिता साह, पूर्व केन्द्रीय सदस्य अवधेश झा, सप्तरी शाखाका सल्लाहकार मनोहर पोखरेल, पूर्व सचिव जितेन्द्र जितुसहितकाले बालबालिका सम्बन्धी समाचार पत्रकारले लेख्दै आएको चर्चा गरे ।
कार्यक्रममा जिल्ला बाल क्लव संजालका बिनिता पासवान, दिप्ती झा, रामविलास साह, त्रिबेणी यादव, साहिल आजमी, मंजुला साह, मोहम्द मिस्टर, सागर पासवान, सोनिया कुमारी मण्डल, मेरिना चौधरी, निरज कुमार साह, विश्वेन्द्र पासवानसहितकाले बालबालिका सम्बन्धी धारणा राखेका थिए ।
कार्यक्रममा बाल क्लव संजालका सल्लाहकार अमर यादव र बरदान श्रेष्ठले सहजीकरण गरेका थिए ।
