राजविराज । आन्दोलनरत नरेन्द्र मेमोरियल मावि बोरियाका विद्यार्थी, विद्यालय र सरोकारबालाबीच सहमति भएको छ । सहमतिसँगै लगाइएको ताला खोल्दै आन्दोलन स्थगित गर्ने निर्णय भएको छ ।
राजविराज नगरपालिकाका शिक्षा शाखा प्रमुख भोगेन्द्र यादवको अध्यक्षतामा विद्यालय व्यवस्थापन समितिका पदाधिकारी, शिक्षक, अभिभावक, स्वबियू पदाधिकारीसहितको बैठकले ६ बुँदे सहमति भएको छ ।
२७ मंसिरका दिन विद्यालयमा भएको घट्ना सम्बन्धमा विद्यार्थीप्रति कुनै किसिमको आग्रह, पूर्वाग्रह नराखी शैक्षिक कृयाकलाप सुचारु गरी विद्यालय परिवारले सौहार्दपूर्ण व्यबहार अपनाउने निर्णय बैठकले गरेको छ ।
विद्यालयमा शुल्क व्यवस्थापन समितिले तोकेको अनुसार उचित शुल्क मात्रै लिने र त्यस वापतको रसीद अनिवार्य दिने, घाइते भएकाको उपचार खर्च विद्यालय परिवारले व्यहोर्ने निर्णय पनि भएको छ ।
यस्तै, राजविराजको शिक्षा शाखा र विद्यालयमा लगाइएको ताला खोल्ने र प्रहरी कार्यालयमा दिइएको निवेदन फिर्ता लिने सर्वसम्मत निर्णय भएको छ ।
राजविराज नगरपालिका वडा नम्बर १६ स्थित उक्त विद्यालयले कक्षा ९ को रजिष्ट्रेशन शुल्क र कक्षा १० को परीक्षा दस्तुर तोकिएकोभन्दा बढी लिएपछि सामाजिक संजालमा लेख्दा प्रअ र व्यवस्थापन समितिका अध्यक्षले कुटपिट गरेको भन्दै विद्यार्थी आन्दोलित भएका थिए ।
