राजविराज । राजविराज नगरपालिकाका निलम्बित मेयर भीमराज यादवले आफूलाई फसाउँन ठूला नेताहरूको हात रहेको बताएका छन् ।
पुर्व मन्त्री उमेश यादवले शुरु गर्न लागेको सप्तरी स्वाभिमान यात्रा सम्बन्धी सुझाव लिन शुक्रबार राजविराजमा आयोजना गरेको अन्तरक्रिया कार्यक्रममा बोल्दै उनले यस्तो कुरा बताएका हुन ।
मेयरमा जितेपछि नगरलाई राम्रो बनाउने अभियान शुरु गरेको बताउँदै उनले त्यहीँ बीचमा आफुलाई फसाइएको बताए । ’मलाई फसाउँन ठूला नेताहरूको हात छ’ उनले भने, ’विशेष अदालतमा पनि पैसाको चलखेल गरेर आफूलाई हराइयो ।’
‘म यसमा फँस्नेबाला थिइनँं । मलाई फसाइँयो । पछाडिबाट छुरा प्रहार गरियो’ उनले भने, ‘सप्तरीकै ठूला नेताहरुले फँसाए । पैसा दिएर मुद्दा दर्ता गर्न लगाए । विशेष अदालतमा पनि पैसाको चलखेल गरी हराइयो ।’ अहिले चुप छु । किनभने मुद्दा चलिरहेको छ ।’
आ.ब. ०७३÷७४ मा राजविराजस्थित राज रंगशालामा स्तरोन्नति कार्यमा मिलेमतोमा भ्रष्टाचार भएको दाबीसहित अख्तियार दुरुपयोग अनुसन्धान आयोगले ०७९ असार २९ गते न्यु गाहिल कन्स्ट्रक्सनका तत्कालीन सञ्चालक भीमराजसहित सातजनालाई प्रतिवादी बनाएर विशेष अदालतमा भ्रष्टाचार मुद्दा दायर गरेको थियो ।
विशेष अदालतले २०८० भदौ १ गते भीमराजलाई दोषी ठहर गरिसकेको छ । उनलाई विशेष अदालतले दुई लाख ६३ हजार ४६८ रुपैयाँ जरिवाना र उति नै बिगो असुलउपर गर्न आदेश दिएको छ ।
आफू जितेर आएको दुई महिने कार्यकामा राजविराजको विकासका निम्ति नक्सा नै परिवर्तन गरेको बताउँदै उनले आफू निलम्बित भएपछि उपमेयरले अवस्था धेरै खराब बनाइदिएको आरोप लगाए । ‘सबैतिरबाट गुनासो आउँछ । फोहोर, बस स्टेन्ड सबै समस्या त्यस्तै छ’ उनले भने ।
