राजविराज । जनमत पार्टीका अध्यक्ष डा. सिके राउतले देशका सबै संयन्त्र ४ जना नेताको हातमा रहेको बताएका छन् ।
शनिबार नेपाल पत्रकार महासंघ, सप्तरीमा पत्रकार सम्मेलन गर्दै राउतले अख्तियारदेखि अदालतसम्मका सबै निकाय तिनै नेताको हातमा रहेको बताए ।
उनले कांग्रेस सभापति शेरबहादुर देउवा, एमाले अध्यक्ष केपी शर्मा ओली, माओवादी अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालकाे हातमा सबै संयन्त्र रहेको बताए ।
सबै निकायमा तीनै नेताले राजनीति नियुक्ति गर्दा नियुक्त भएकाहरु उनीहरुकै कुरा सुन्ने गरेको उनले बताए ।
‘अरु देशमा न्यायाधीश, निर्वाचन अधिकृत, अख्तियार अधिकृतसहितका निकायका पदाधिकारी उत्तीर्ण भएर र निर्वाचित भएर आउँछन्’ उनले भने, ‘तर यहाँ राजनीति नियुक्त भइरहेकाले देशमा हुने कान्डका दोषीले सजाय पाउदैनन् । र, उन्मुक्ति पाउँछन् ।’
देशका शाषकवर्ग १० सिट भएका पार्टीलाई नेतृत्व दिन तयार तर मधेशी पार्टीको बढी सिट भएपनि दिन नमानेकाे बताए ।
‘भित्र भित्रै प्रतिगामी एजेन्डामा सबै मिलेकै हुन्छन्’ उनले भने, ‘मधेश, आदिवासी, थारूसहित पिछडिएकालाई अधिकार दिने पक्षमा छैनन् ।’
अधिकार लिन अब सडकको विकल्प नरहेको भन्दै उनले त्यसको विकल्प नभएको बताए । ‘आन्दोलन नै नगर्ने हो भने अरु विकल्प के ?’ उनलेे प्रश्न गरे ।
आन्दोलनका लागि मधेश, थारू, आदिवासी एकजुट हुनुपर्ने उनले बताए ।
