राजविराज । सप्तरीको डाक्नेश्वरी नगरपालिकाले गरेको शिक्षक सरुवाको बिरोध भएको छ । राजनीतिक पूर्वाग्राही राखेर शिक्षकको सरुवा भएको आरोप सरोकारबालाले लगाएका छन् ।
पूर्व प्रदेश सांसद विदेश्वर यादव ‘विक्की’ ले शैक्षिक सुधारको लागी सरुवा गर्ने, कार्वाही गर्ने अधिकार पालिकालाई भएपनि राजनीति पूर्वाग्रह राखेर अधिकारको दुरुपयोग गरिएको बताएका छन् ।
राजनीति प्रतिशोध लिन घृणित मानसिकता राखेर मानवीय संबेदना लाई समेत ख्याल नगरी अपांग, महिला र राम्रो शिक्षण गर्ने शिक्षकलाई कार्वाही स्वरुप सरुवा गर्ने र बदनाम शिक्षक लाई प्रोत्साहन गरिएको उनले उल्लेख गरेका छन् । ‘एउटै स्कुलमा एउटै विषयका पाँच जना शिक्षक पठाउनु शिक्षा र शिक्षण प्रतिको नगर प्रमुखको सोचले पालिका भित्रका समग्र शिक्षा प्रणालीलाई नै ध्वस्त पार्नेछ’ यादवले सामाजिक संजालमा लेखेका छन्, ‘नगर प्रमुखको दुषित मानसिकताको कारणले मानसिक तनाव मा रहेका शिक्षकले बालबालिकालाई सहि शिक्षा दिन सक्दैनन् ।’
विद्यालय भर्ना, पाठपुस्तक बितरण, खाजा भत्ता बितरणसहितका आफ्नो दायित्व पूरा नगरी नगर प्रमुखले मनोमानी गरेको उनको भनाई छ । शिक्षकलाई दरबन्दी मिलानको नाममा संघिय शिक्षा ऐन २०२८, शिक्षा नियमावली २०५९ र दरबन्दी मिलान कार्यबिधी २०७२ को मर्म बिपरित शिक्षालाई ध्वस्त पार्ने नियतले गरिएको सरुवा, पदस्थापना तथा काज सरुवा शिक्षकप्रतिको अन्याय भएको उनले उल्लेख गरेका छन् । ‘अन्यायको विरुद्ध उठन लडन सिकाउने गुरु बर्गको अधिकारको लडाइँमा साथ रहने छु’ उनले भनेका छन्, ‘डाकनेश्वरीभित्रका सचेत नागरिकलाई आफ्नो बालबालिकाको शैक्षिक भबिष्य बचाउनका लागि शिक्षकको लडाइँमा साथ सहयोग दिन हार्दिक अनुरोध गर्दछु ।’
