राजविराज । शुक्रबार दिउँसो राजविराजस्थित औषधि पसलको अनुगमन गर्ने क्रममा पसलेहरुको भागाभाग भएको छ । संयुक्त अनुगमन समितिद्धारा अनुगमन भइरहेको जानकारी पाए लगत्तै अधिकांस औषधि पसले आफ्नो सटर झारेर वेपत्ता भएको देखियो ।
जिल्ला प्रशासन कार्यालय सप्तरीको अगुवाईमा जिल्ला जनस्वास्थ्य, कर, घरेलु तथा साना उद्योग कार्यालय, उपभोक्ता हित संरक्षण मञ्च, सप्तरी उद्योग वाणिज्य संघ, सुरक्षा निकाय लगायतको संयुक्त अनुगमन टोली खटिएको थियो ।
अनुगमन टोली आएको खबर पाउनेवित्तिकै धेरै औषधि पसले पसल बन्द गरेर भागेको टोलीका एक सदस्यले बताए । उनका अनुसार विल विजक, प्रतिवन्धित औषधि बेचविखन भए÷नभएको, सरसफाई, डेट एक्सपायर, भण्डारण लगायतका विषयमा औषध पसलको अनुगमन गर्न टोली निस्किएको थियो ।
धेरैले औषधि पसलेले सटर झारेपनि राजविराज ७ स्थित रुपेश राज फार्मेसी, साइमेडिको इन्टरप्राइजेज, राजविराज ३ स्थित एस औषधी पसल, आर एस ड्रग्स डिस्ट्रिव्युटर्स, वडा नम्बर ४ स्थित राजविराज फार्मेसी, शुसान्त प्याथोलोजी, मारुती मेडिकल, गजेन्द्र नारायण सिंह अस्पतालको फार्मेसी, छिन्नमस्ता अस्पताल, राजविराज ६ स्थित जनता डिस्पेन्सेरीको अनुगमन गरिएको छ ।
अनुगमनका क्रममा बिल बिजक नकाटेको र सरसफाई नगरेको भन्दै केहि पसललाई रु ५ हजारदेखि १० हजारसम्म जरिवाना गरिएको प्रमुख जिल्ला अधिकारी किरण थापाले जानकारी दिए ।
अनुगमन टोलीका एक सदस्यका अनुसार फार्मेसीको अनुमति लिएर भित्र ल्याब चलाइरहेको सूचना समेत आएको छ । ती पसलहरुको अब गोप्य तरिकाले अनुगमन गरी कार्वाह ीगर्ने तयारी अनुगमन समितिको छ ।
