राजविराज । बर्षाका कारण आवतजावत गर्न समस्या भइरहेको राजविराज–सखडा तथा सखडा– नेउर सडकको पाँच दिनभित्र मर्मत सम्भार गरिने भएको छ ।
बर्षाले हिलाम्मे भई आबजाबत अबरुद्ध भएको यो सडकलाई पाँच दिनभित्र मर्मत सम्भार गरिने सडक डिभिजन कार्यालय लहानका प्रतिनिधी र ठेकेदार कम्पनीले प्रतिबद्धता जनाएका छन् ।
छिन्नमस्ता गाउँपालिकामा बिहीबार सडक डिभिजनका कर्मचारी सहित स्थानीय जनप्रतिनिधिको बसैको बैठकले शुक्रबार (भोली) देखी नै आबश्यक मर्मत सम्भार गरि आबतजाबत सहज बनाउन काम शुरु गरिने निर्णय भएको पालिका अध्यक्ष विद्यानन्द चौधरीले जानकारी दिए ।
‘पाँच दिनभित्र मर्मत सम्भार गरी आवतजावत सहज बनाउने निर्णय भएको छ’ उनले भने, ‘छैठौं दिनसम्म काम समपन्न नभए हामी जनप्रतिनिधी सडक डिभिजन कार्यालय लहानमा धर्नामा बस्नेछौ ।’
रुपनी –छिन्नमस्ता २२ किलोमीटर सडकको टेण्डर भइसक्दा समेत कामले गति लिन सकेको छैन् । अहिले बर्षाको समयमा राजविराज हुँदै छिन्नमस्ता दर्शनका लागि जाने श्रद्धालुलाई सास्ती खेप्नुपरिरहेको छ ।
बैठकमा छिन्नमस्ता गाउँपालिकाका अध्यक्ष चौधरी, उपाध्यक्ष राजुदेवी यादवसहितका जनप्रतिनिधी, सडक डिभिजन कार्यालय लहानका इन्जिनियर जिबछ यादव, सुपरभाइजर अंकित साह, निर्माण व्यवसायी बब्लु चौधरीसहितको उपस्थिति थियो ।
