महेन्द्र सदा
पातो । आफूहरूकाे मागप्रति चासो नदिएको भन्दै सप्तरीको डाक्नेश्वरी नगरपालिकाका प्रमुख दलका नेताहरुले सोमबार नगरपालिकाको कार्यालयमा धर्ना दिएका छन् ।
नेपाली कांग्रेस, जनता समाजवादी पार्टी (जसपा) नेपाल, नेकपा माओवादी केन्द्र र लोकतान्त्रिक समाजवादी पार्टी (लोसपा) का नेताहरुले आफूहरुले राखेको मागको सन्दर्भमा पालिका प्रमुख उदासीन रहेको बताउँदै पालिकाकाे कार्यालयमा धर्ना शुरु गरेका हुन् । उनीहरूले सोमबार बिहान ११ बजेदेखि २ घण्टा धर्ना दिए ।
उनीहरूले आइतबारदेखि धर्ना दिन शुरु गरेका हुन ।
नगर शिक्षा ऐन संशोधन गर्न, शिक्षक सरुवा खारेज गर्न, कोरोना खर्च सार्वजनिक गर्न, इन्धन खर्च सार्वजनिक गर्नसहितका माग राख्दै दलहरुले १ जेठ्मा ज्ञापन बुझाएको थियोे ।
पालिका प्रमुख रामलखन मलाहले असार १६ गते, २० गते, २५ गते वार्ताका लागि बोलाएपनि कुनै छलफल नै नगरेको दलका नेताहरूको भनाई छ ।
यी चार दलका नेताहरूले शुक्रबार पत्रकार सम्मेलन गरि आन्दोलनको घोषणा गरेका थिए । आन्दोलन अन्तर्गत उनीहरूले शनिबार मसाल जुलुस प्रदर्शन गरेका थिए ।
