राजविराज । इस्लामी संघले मदिरा तथा लागूऔषधबिरुद्धको अभियान शुरु गरेको छ । राष्ट्रव्यापी यो अभियान देशैभरि शुरु गरिएको हो ।
अभियानबारे इस्लामी संघ, सप्तरीले मंगलबार पत्रकार सम्मेलन गरी जानकारी गराएको छ । पत्रकार सम्मेलनमा संघका मधेश प्रदेश अध्यक्ष अब्दुल मनानले नशालु पदार्थ तथा लागूऔषध प्रयोग परिवार र समाजका लागि पनि घातक रहेको भन्दै यसबाट सबैलाई बच्न जागरुक बनाउने उद्देश्यले अभियान शुरु गरिएको बताए ।
‘नशाको कुलतमा लागेका व्यक्तिले आफ्नो स्वास्थ्य, मनमस्तिष्क, घरपरिवार र आफ्नो जीवन पनि गुमाउँछन्’ उनले भने, ‘समाजलाई लागूऔषध प्रभावबाट बचाउन सके मात्रै घरेलु झगडा, कुटपिट, हिंसा, मानसिक तनाव, सम्बन्ध विच्छेद, पैसा र धन सम्पत्तिको अपव्यय, नैतिक विकार र बिभिन्न रोग, दुर्घटनाबाट सुरक्षित रहन सकिन्छ ।’
मादक तथा लागूपदार्थको उत्पादन, व्यापार, आयात र निजकासीमा कड प्रतिबन्ध लगाउन सरकारसँग आग्रह गर्दै उनले यस्ता कम्पनीको दर्ता खारेज गरी अन्य उपयोगी उत्पादनमा संलग्न गराउनुपर्ने बताए ।
यो अभियानमा साथ दिन सबैसँग उनले आग्रह गरेका छन् ।
आगामी असार १६ गतेसम्म संचालन हुने अभियान अन्तर्गत जिल्लाको बिभिन्न ठाउँमा लागूऔषध र मदिराबाट बच्न चेतनामूलक कार्यक्रमहरु संचालन गरिने संघका केन्द्रीय सदस्य कलीम खानले जानकारी दिए ।
