राजविराज । अविरल बर्षाका कारण सप्तरीको बिभिन्न ठाउँ जलमग्न बनेको छ । एक्कासी आएको बर्षाका कारण बिभिन्न नदी र खोलामा आएको बाढी मानव वस्तीमै प्रवेश गरेको छ ।
सदरमुकाम राजविराजसहित हनुमाननगर कंकालिनी, कंचनरुप नगरपालिका तथा तिलाठी कोइलाडी, रुपनी गाउँपालिकाका धेरै ठाउँ जलमग्न बनेको छ ।
अबिरल बर्षाका कारण राजविराजको पानी टयांकी रोड, सिरहा रोड दिनभरि जलमग्न रह्यो । बर्षा थामिएपछि साँझबाट पानीको बहाब कम भएको स्थानीयले बताएका छन् । राजविराजको वडा नम्बर ७, ६ र २ का धेरै व्यक्तिको घरमै पानी पसेको छ ।
राजविराज ८ स्थित घरेलु तथा साना उद्योग कार्यालय समेत जलमग्न बनेको छ । वर्षाको पानी कार्यालय प्रमुख आवास, स्टोर शाखा, फायल फाँट, स्टाप कोठामा छिरेको कार्यालय प्रमुख रेखा कुमारी यादवले बताइन् ।
उनका अनुसार कार्यालय परिसरमा वर्षाको पानी जमेर आवतजावतमा समेत समस्या भएपछि पम्पिंगसेट लगाएर पानी फाल्नु परेको छ ।
अबिरल बर्षाका कारण हनुमाननगर कंकालिनी नगरपालिका वडा नम्बर १, ३, ४, १३ र १४ का बिभिन्न गाउँका बासिन्दाको घरमा पानी पसेको छ । महुली र कोशी नदीमा आएको बाढी यी गाउँहरुमा प्रवेश गरेको हो ।
तिलाठी कोइलाडी गाउँपालिकाको वडा नम्बर १, ४ र ५ मा खाँडो खोलाको बाढी पसेको छ ।
यस्तै, खाँडो खोलामा आएको बाढी रुपनी गाउँपालिका वडा नम्बर १ का दर्जनौं व्यक्तिको घरमा प्रवेश गरेको छ । स्थानीयहरुका अनुसार रुपनी गाउँपालिका १ स्थित तटबन्ध माथिबाट बाढी गाउँ पसेको छ ।
बाढी गाउँ पस्दा महेन्द्र मरिक, राजेन्द्र मरिक, राम नारायण महतोसहित दुई दर्जन परिवारको घर जलमग्न बनेको छ । जसका कारण उनीहरु समस्यमा परेका छन् ।
रुपनी गाउँपालिका अध्यक्ष दिनेश कुमार यादव, विपद व्यवस्थापन संयोजक मिथिलेश यादवसहितको टोली प्रभावित क्षेत्रमा पुगेर स्थलगत अवलोकन गर्दै समस्यामा परेकालाई तत्कालै परिवारलाई राहत स्वरुप भुजा, दाल लगायतका सामाग्री बितरण गरेका छन् ।
