राजविराज । खासगरी यौन सम्पर्कको माध्यमले लाग्ने एचआइभी संक्रमितको संख्या सप्तरीमा बढ्दै गएको छ । पछिल्लो एक बर्षको अवधीमा १४ जना एचआइभी संक्रमित देखिएका छन् ।
सहयोगी समाजले आईतबार राजविराजमा आयोजना गरेको सरोकारबालासँगको अन्तरकृया कार्यक्रममा हालसम्म जिल्लामा १८१ जना एचआइभी संक्रमित रहेको तथ्यांक देखाइएको छ । यसमध्ये ८८ जना पुरुष, ८३ जना महिला र ९ जना तेस्रो लिंगी छन् ।
अन्तरकृयामा सहयोगी समाजका कार्यक्रम संयोजक प्रदीप लामिछानेले संक्रमितमध्ये १८ जना बालबालिका समेत छन् । उनका अनुसार २ जना बालबालिका २ बर्ष उमेरभित्रकै छन् ।
संक्रमित सबै निम्न वर्गका व्यक्ति रहेका छन् ।
गजेन्द्रनारायण सिंह अस्पताल राजविराजको एचआइभी फोकल पर्सन सुनिता यादवले आमाको गर्भबाट संक्रमितै अवस्थामा ती दुई बालबालिका जन्मिएको जानकारी दिइन् ।
उनका अनुसार संक्रमित सबै सम्पर्कमा रहेको र नियमित औषधि सेवन गरिरहेका छन् ।
यादवले शंका लागेको आधारमा आफूहरुले एचआइभीको जाँच गर्ने गरिएको बताउँदै अहिलेसम्म संक्रमित देखिएका सबै निम्न वर्गका व्यक्ति रहेको बताइन् ।
उनले कुल संक्रमितमध्ये १३४ जनाको स्वास्थ्य बिमा समेत गराइदिएको बताइन् ।
जिल्ला स्वास्थ्य कार्यालयका प्रमुख देबकान्त झाले एचआइभी संक्रमितका लागि पालिकाहरुले पनि सहयोग गर्नुपर्ने बताए ।
कुन पालिकामा कति संक्रमित ?
कार्यक्रममा जिल्लाको १८ वटै पालिकाको एचआइभी संक्रमितको तथ्यांक प्रस्तुुत गरियो । जस अनुसार सबैभन्दा बढी संक्रमित सदरमुकाम समेत रहेको राजविराज नगरपालिकामा छ । यो नगरपालिकामा १२ पुरुष, ७ महिला र २ तेस्रो लिंगी गरी २१ जना संक्रमित छन् । दोस्रोमा हनुमाननगर कंकालिनी नगरपालिका छ । यो पालिकामा ८ पुरुष र १० महिला गरी १८ जना संक्रमित छन् ।
तेस्रोमा डाक्नेश्वरी नगरपालिका छ । यो पालिकामा ९ पुरुष र ७ महिला गरी १६ जना एचआइभी संक्रमित छन् ।
चौथोमा कंचनरुप नगरपालिका र छिन्नमस्ता गाउँपालिका छन् । यी दुबै पालिकामा १५÷१५ जना संक्रमित छन् । कंचनरुपमा ६ पुरुष, ८ महिला र १ तेस्रो लिंगी तथा छिन्नमस्तामा ८ पुरुष, ६ महला र १ तेस्रो लिंगी संक्रमित छन् ।
शम्भुनाथ नगरपालिकामा ८ पुरुष, ४ महिला र १ तेस्रो लिंगी गरी १३ जना संक्रमित रहँदा खडक नगरपालिकामा पनि १३ जना नै छन् । यहाँ ७ पुरुष र ६ महिला संक्रमित छन् ।
राजगढ गाउँपालिकामा ६ पुरुष र ४ महिला गरी १० जना संक्रमित रहँदा अग्निसाइर कृष्णसवरन गाउँपालिकामा ३ पुरुष र ६ महिला गरी ९ जना, बलान बिहुल गाउँपालिकामा ५ पुरुष र २ महिला गरी ७ जना एचआइभी संक्रमित छन् ।
तिलाठी कोइलाडी गाउँपालिकामा ५ पुरुष र १ महिला गरी ६ जना रहँदा बोदे बर्साइन नगरपालिकामा ६ जना नै छन् । बोदे बर्साइनमा ५ पुरुष र १ महिला संक्रमित छन् ।
महादेवा गाउँपालिकामा २ पुरुष र ३ महिला गरी ५ जना, रुपनी गाउँपालिकामा १ पुरुष र २ महिला गरी ३ तीन जना तथा सप्तकोशीमा १ महिला र १ पुरुष गरी २ जना संक्रमित छन् ।
बिष्णुपुर गाउँपालिकामा १ पुरुष, तिरहुत गाउँपालिकाम १ महिला र सुरुङा नगरपालिकामा १ जना पुरुष एचआइभी संक्रमित छन् ।
