राजविराज । नेपाल प्रहरीका अतिरिक्त प्रहरी महानिरीक्षक (एआइजिपी) भीम ढकालले सप्तरीप्रतिको आफ्नो छुट्टै किसिमको माया रहेको बताएका छन् ।
नेपाल पत्रकार महासंघ, सप्तरीले शनिबार गरेको सम्मान कार्यक्रममा ढकालले सप्तरीलाई कहिले पनि बिर्सन नसकिने बताए । ‘सप्तरीमा छँदा यहाँका जनताले गरेको साथ र सहयोगलाई म बिर्सन सक्दिनँ’ उनले भने, ‘त्यहीं भएर सप्तरी आएको छु । र, आइरहन्छु ।’
ढकाल २०७२ सालमा भएको मधेश आन्दोलनको समयमा सप्तरी प्रहरी प्रमुख एसपीको रुपमा कार्यरत थिए । त्यस बेला उनले सबैको साथ लिएर जिल्लालाई शान्त बनाउन भूमिका निर्वाह गरेका थिए ।
अहिले एआइजिपी पदमा आउँदा समेत सप्तरीलाई बिर्सन नसकेको उनले बताए । यो जिल्लालाई जहिले पनि झलझली सम्झिने गरेको उनको भनाई छ ।
कार्यक्रममा नेपाल पत्रकार महासंघका अध्यक्ष श्रवणकुमार देवले एआइजिपी ढकाललाई गमछा ओढाएर सम्मान गर्दै मायाको चिनो प्रदान गरे ।
सप्तरी आएका ढकालले छिन्नमस्ता भगवती, कंकालिनी र राजदेवीको दर्शन र पूजापाठ समेत गरेका छन् ।
उनलाई सप्तरी युथ नेपालका युवाहरु समेतले गमछा लगाएर स्वागत गरेका छन् ।
