गंगा प्रसाद साह
भारदह । अबिरल बर्षाका कारण महुली खोलाको बाँध भत्किँदा सप्तरीको एक पालिकाका सयौं घर डुबानमा परेको छ ।
महुली खोलाको तिरहुत गाउँपालिका वडा नम्बर १ स्थित बाँध बुधबार बिहान भत्किएको हो । करिब २ सय मिटर बाँध भत्किँदा मा भत्किँदा हनुमाननगर कंकालिनी नगरपालिकाको वडा नम्बर १ भारदह र वडा नम्बर ३ पोर्ताहका सयौं घर डुबानमा परेको हो ।
बाढीको पानी घरभित्र पस्दा यस क्षेत्रका बासिन्दालाई बस्न समेत समस्या भएको छ ।
पानीका कारण खाना पकाउन समेत समस्या भएकाले भोकभोकै बस्नुपरेको स्थानीयले बताएका छन् ।
बाढीको पानी पस्दा प्रसिद्ध कंकालिनी मन्दिरको प्राङण पनि डुबानमा परेको छ ।
बाँध भत्किएर बाढी गाउँमै पसेपछि पीडितहरुले पूर्व पश्चिम राजमार्ग अवरुद्ध गरेका थिए । दिउँसो १ देखि आधा घण्टा चक्काजाम गरेपछि पुगेको प्रमुख जिल्ला अधिकारीसहितको टोलीले समस्या समाधानमा तदारुकता देखाउने प्रतिबद्धता जनाएपछि चक्काजाम खोलिएको थियो ।
