राजविराज । सप्तरीको डाक्नेश्वरी नगरपालिकाका प्रमुख दलले जनप्रतिनिधीबिरुद्ध आन्दोलन गर्ने भएका छन् ।
पालिकाभित्रका प्रमुख चार राजनीतिक दलका नेताहरुले शुक्रबार संयुक्त पत्रकार सम्मेलन गर्दै आन्दोलन गर्ने बताएका हुन् । उनीहरुले आफूहरुले राखेको माग सम्बोधन गर्न पालिका प्रमुखले आलटाल गरेकाले आन्दोलनको विकल्प नभएको बताए ।
नेपाली कांग्रेस, जनता समाजवादी पार्टी (जसपा) नेपाल, नेकपा माओवादी केन्द्र र लोकतान्त्रिक समाजवादी पार्टी (लोसपा) का नेताहरुले आफूहरुले राखेको मागको सन्दर्भमा पालिका प्रमुख उदासीन रहेको बताए ।
‘हामीले जेठ १ गते नै ज्ञापन बुझाउँदै १४ बुँदे माग अघि सारेका थियौं’ नेपाली कांग्रेसका नगर सभापति एवं प्रमुखका प्रत्यासी नारायण यादवले भने, ‘पालिका प्रमुख रामलखन मलाहले असार १६ गते, २० गते, २५ गते वार्ताका लागि बोलाएपनि कुनै छलफल नै गरेनन् ।’
उनले नगर शिक्षा ऐन संशोधन गर्न, शिक्षक सरुवा खारेज गर्न, कोरोना खर्च सार्वजनिक गर्न, इन्धन खर्च सार्वजनिक गर्नसहितका माग राख्दै दलहरुले ज्ञापन बुझाएको बताए ।
उनले पालिकामा प्रमुख मुखियाले एमालेको भर्ती केन्द्र बनाएको आरोप लगाए ।
पत्रकार सम्मेलनमा जसपाका नगर उपाध्यक्ष ओमप्रकाश यादवले कर्मचारी भर्ना गर्दा रकमको चलखेल गरेको, ८० प्रतिशत योजनाको उपभोक्ता समिति प्रमुख मुखियाले आफैं बनाउने गरेको बताए । उनले पालिकालाई प्रमुखले भ्रष्टाचारको गढ बनाएको आरोप लगाए ।
जसपा नेपालकै नेता राजेश्वर रायले कर्मचारी भर्ना आ्हवान गर्दा कार्यालय सहयोगी पदमा पनि डेढ लाखसम्म असुली गर्ने गरेको पाइएको बताए ।
उनले शिक्षा अधिकृत कृष्णकुमार यादव शिक्षालाई बर्बाद गर्दै प्रमुखसँग मिलेर भ्रष्टाचारीमा संलग्न रहेको बताए ।
पत्रकार सम्मेलनमा उपस्थित भएका वडा नम्बर ४ का अध्यक्ष भोगेन्द्र यादव, ६ का कुशेश्वर यादव र ७ का शत्रुद्यन मण्डलले पनि प्रमुख मुखिया मनमानी तरिकाले काम गरिरहेको बताए ।
आन्दोलन अन्तर्गत शनिबार (भोली) साँझ मसाल जुलुस प्रदर्शन गरिनेछ भने आईतबारदेखि १३ गतेसम्म धर्ना दिने उनीहरुले बताएका छन् ।
