राजविराज । नेपाली कांग्रेस अर्थसहित चार मन्त्रालय लिएर मधेश प्रदेश सरकारमा सहभागी भएको छ ।
कांग्रेसले अर्थ मन्त्रालयको जिम्मेबारी सुनिल यादवलाई दिएको छ । कांग्रेसका जनार्दन सिंह क्षेत्री भूमि व्यवस्था, कृषि तथा सहकारी, शेष नारायण यादव उर्जा, सिचाई तथा खानेपानी र कौशल किशोर राय श्रम तथा यातायात मन्त्री बनेका छन् ।
मुख्यमन्त्री सतिश कुमार सिंहले अर्थ मन्त्रालय आफ्नो पार्टीले राख्ने अडान राखेपछि कांग्रेस सरकारमा जान अनिच्छा देखाएको थियो । दुबै दलको छलफलपछि जनमतले अर्थ मन्त्रालयसहित चार मन्त्रालय कांग्रेसलाई दिएको हो ।
यस्तै, लोकतान्त्रिक समाजवादी पार्टी (लोसपा) बाट प्रमुख सचेतक रानी शर्मा तिबारी मन्त्री बनेकी छन् । उनी शिक्षा तथा संस्कृति मन्त्री बनेकी हुन् ।
यसअघि शिक्षा तथा संस्कृति मन्त्रालयको जिम्मेबारी सम्हालेका नेकपा एमालेका राजकुमार लेखीलाई गृह, संचार तथा कानुन मन्त्रालयको जिम्मेबारी दिइएको छ । लेखी यसअघि सरोज कुमार यादव नेतृत्वको सरकारमा पनि गृह, संचार तथा कानुन मन्त्री थिए ।
नवनियुक्त मन्त्रीहरुले बिहीबार राति पौने ८ बजेतिर शपथ ग्रहण गरेका छन् । उनीहरुलाई प्रदेश प्रमुख सुमित्रा सुवेदी भण्डारीले शपथ ग्रहण गराए ।
